بابر اور رضوان حج کی ادائیگی کیلئے سعودی عرب پہنچ گئے

جدہ: پاکستانی کرکٹ ٹیم کے کپتان بابراعظم اور وکٹ کیپر بیٹر محمد رضوان فریضہ حج کی ادائیگی کیلئے سعودی عرب پہنچ گئے۔

سماجی رابطے کی سائٹ ٹوئٹر پر کپتان بابراعظم اور وکٹ کیپر بیٹر محمد رضوان کو مسجد نبویؐ کے سامنے دیکھا جاسکتاہے، دونوں کرکٹرز نے اپنے عرب مداح کے ہمراہ تصویر کھنچوائی جو سوشل میڈیا پر تیزی وائرل ہورہی ہے۔

کپتان بابراعظم اپنی والدہ اور وکٹ کیپر بیٹر محمد رضوان مقدس فرض کی ادائیگی کیلئے اپنی اہلیہ کے ہمراہ سعودی عرب میں مقیم ہیں۔

حج کی ادائیگی کے باعث پاکستان کرکٹ بورڈ (پی سی بی) نے دونوں کرکٹرز کو لاہور میں جاری ٹریننگ کیمپ میں شرکت سے مستثنیٰ قرار دیتے ہوئے خصوصی اجازت دی ہے۔

رضوان اور بابراعظم سری لنکا کے خلاف آئندہ ٹسٹ سیریز کی تیاری کیلئے جولائی کے پہلے ہفتے میں کراچی میں دوبارہ ٹیم جوائن کریں گے۔ واضح رہے کہ بابراعظم اور رضوان سمیت پاکستانی عازمین کی بڑی تعداد حج کی سعادت حاصل کرنے کیلئے سعودی عرب پہنچ رہی ہے۔

واضح رہے کہ اس سے قبل بابراعظم نے افتخار احمد، فہیم اشرف، حارث رؤف اور دیگر پاکستانی کرکٹرز نے رمضان المبارک کے مقدس مہینے میں عمرہ کی ادائیگی کیلئے مقدس شہر مکہ مکرمہ و مدینہ شریف کا سفر کیا تھا۔