بہار کی سیاست میں بڑی تبدیلی: وزیراعلیٰ نتیش کمار کا قانون ساز کونسل سے استعفیٰ منظور

پٹنہ: بہار قانون ساز کونسل کے چیئرمین اودھیش نارائن سنگھ نے وزیر اعلیٰ نتیش کمار کی کونسل کی رکنیت سے استعفیٰ کو باقاعدہ طور پر قبول کر لیا ہے۔

آج یہاں میڈیا کے نمائندوں سے گفتگو کرتے ہوئے چیئرمین اودھیش نارائن سنگھ نے بتایا کہ وزیر اعلیٰ نے اپنی رکنیت چھوڑنے کی درخواست پیش کی تھی، جسے پارلیمانی روایات اور آئینی ضوابط کے تحت منظور کر لیا گیا ہے۔

پارلیمانی قوانین کے مطابق، ایک وقت میں دو ایوانوں کی رکنیت نہیں رکھی جا سکتی، اسی لیے انہوں نے کونسل کی نشست چھوڑی۔چیئرمین کے مطابق، تمام قانونی کارروائیاں مکمل ہونے کے بعد اس نشست کو ‘خالی’ قرار دے دیا جائے گا۔

اودھیش نارائن سنگھ (چیئرمین) نے کہا کہ "وزیر اعلیٰ کے ساتھ ملاقات میں تمام آئینی پہلوؤں پر تبادلہ خیال کیا گیا۔ یہ استعفیٰ پارلیمانی روایات اور مقررہ وقت کے مطابق ہے، جس کی منظوری کے بعد اب ضابطے کے مطابق اگلی کارروائی کی جائے گی۔

"واضح رہے کہ نتیش کمار کے راجیہ سبھا جانے کے بعد بہار کی سیاست میں نئی صف بندی دیکھی جا رہی ہے۔ ان کا قانون ساز کونسل سے استعفیٰ محض ایک قانونی عمل نہیں بلکہ ریاست کی اعلیٰ قیادت میں آنے والی تبدیلیوں کا پیش خیمہ بھی ہو سکتا ہے۔