ممبئی میں بی ایم ڈبلیو کار نے اسکوٹر پرجارہے جوڑے کو کچل دیا، خاتون ہلاک

نئی دہلی:ممبئی کے ورلی علاقہ سے ایک حیران کن واقعہ سامنے آیا ہے۔ یہاں ایک تیز رفتار بی ایم ڈبلیو کار نے بازار سے مچھلی خریدنے جا رہے جوڑے کو کچل دیا۔ اس واقعہ میں خاتون کی موت ہو گئی ہے جبکہ اس کے شوہر کی حالت تشویشناک ہے۔

پولیس کے مطابق یہ واقعہ ورلی کے اٹیریا مال کے قریب پیش آیا۔ پولیس کی تفتیش سے پتہ چلا ہے کہ متاثرہ جوڑا اپنے اسکوٹر پر مچھلی لے کر گھر واپس جا رہا تھا۔ اس دوران اسے پیچھے سے آنے والی کار نے ٹکر مار دی۔ ٹکر اتنی شدید تھی کہ ان کا اسکوٹر پلٹ گیا اور دونوں گاڑی کے بونٹ پر جا گرے۔

خاتون کے شوہر نے کسی طرح خود کو گاڑی کے بونٹ سے الگ کیا لیکن خاتون ایسا نہ کرسکی۔ اس واقعہ میں خاتون شدید زخمی ہوگئی۔ جسے بعد ازاں قریبی اسپتال لے جایا گیا۔ جہاں ڈاکٹروں نے اسے مردہ قرار دے دیا۔

اس واقعہ میں خاتون کے شوہر کی حالت تشویشناک ہے جو اس وقت زیر علاج ہے۔ واقعہ کے بعد ملزم کار ڈرائیور موقع سے فرار ہو گیا۔ تاہم بعد میں پولیس نے ملزم ڈرائیور کو حراست میں لے لیا۔ پولیس فی الحال اس پورے معاملے کی تحقیقات کر رہی ہے۔