بالی ووڈ کی مہنگی ترین شادی۔ صرف 37 مہمان مگر 77 کروڑ کا خرچ
دیپیکا اور رنویر نے نومبر 2018 میں اٹلی کے خوبصورت مقام لیک کومو میں شادی کی۔ یہ تقریب مکمل طور پر نجی تھی اور سیکورٹی کے سخت انتظامات کئے گئے تھے۔ شادی 14 اور 15 نومبر کو دو دن تک جاری رہی۔
نئی دہلی: بالی ووڈ میں شاندار اور پرتعیش شادیوں کا رجحان گزشتہ ایک دہائی میں بے حد بڑھ گیا ہے۔ انڈسٹری کے کئی معروف ستارے جیسے رنویر سنگھ۔دیپیکا پادوکون، انوشکا شرما۔ویرات کوہلی، پریانکا چوپڑا-نک جونس، وکی کوشل-کترینہ کیف اور عالیہ بھٹ-رنبیر کپور نے اپنی شادیوں پر خوب دولت لٹائی اور انہیں یادگار بنایا۔
ایسے میں اگر سب سے زیادہ پرتعیش مگر محدود مہمانوں والی کسی شادی کی بات کی جائے تو وہ رنویر سنگھ اور دیپیکا پادوکون کی شادی تھی۔ حیران کن طور پر اس تقریب میں صرف 37 مہمان شریک ہوئے، مگر اس پر خرچ ہوا تقریباً 77 کروڑ روپے۔
دیپیکا اور رنویر نے نومبر 2018 میں اٹلی کے خوبصورت مقام لیک کومو میں شادی کی۔ یہ تقریب مکمل طور پر نجی تھی اور سیکورٹی کے سخت انتظامات کئے گئے تھے۔ شادی 14 اور 15 نومبر کو دو دن تک جاری رہی۔ مہمانوں کو مکمل طور پر میڈیا سے دور رکھا گیا اور تقریب میں کسی بھی قسم کی تصویر یا ویڈیو لیک ہونے کی اجازت نہیں تھی۔
رنویر سنگھ نے اپنی شادی کے دن سی-پلین یعنی پانی پر چلنے والے خصوصی طیارے میں بارات لے جا کر تقریب کو مزید یادگار بنا دیا۔ اس شادی میں کھانے سے لے کر رہائش تک ہر انتظام انتہائی شاندار اور عالیشان تھا، جس کی وجہ سے خرچ بھی تقریباً 77 کروڑ روپے تک جا پہنچا۔
رنویر اور دیپیکا کی محبت کی کہانی 2013 میں ریلیز ہونے والی فلم گولیوں کی راسلیلا رام لیلا کے سیٹ پر شروع ہوئی تھی۔ یہی فلم ان دونوں کی پہلی ملاقات کا ذریعہ بنی۔ دلچسپ بات یہ ہے کہ یہ فلم بھی 15 نومبر 2013 کو ریلیز ہوئی تھی اور دونوں نے پانچ سال بعد اسی تاریخ یعنی 15 نومبر کو شادی کی۔
اس کے بعد دونوں نے باجی راؤ مستانی اور پدماوت جیسی بڑی اور بلاک بسٹر فلموں میں ایک ساتھ کام کیا، جنہوں نے باکس آفس پر شاندار کامیابی حاصل کی۔
دیپیکا پادوکون نے حال ہی میں 8 ستمبر 2024 کو بیٹی کو جنم دیا، جس کا نام انہوں نے ‘دعا’ رکھا ہے۔ دونوں اپنی ذاتی اور پیشہ ورانہ زندگی کو خوبصورتی سے ساتھ لے جا رہے ہیں۔
