بی جے پی رکن اسمبلی کی بیٹی کے خلاف خاتون پولیس اہلکار کو تھپڑ مارنے کا مقدمہ درج

سرنگاپٹنم: کرناٹک کے تمکورو رورل حلقہ سے بی جے پی کے رکن اسمبلی سریش گوڑا کی بیٹی ایشوریہ کے خلاف سری رنگاپٹنم کے ایک مندر میں خاتون پولیس اہلکار کو مبینہ طور پر تھپڑ مارنے کے الزام میں مقدمہ درج کر لیا گیا ہے۔

اطلاعات کے مطابق، ایشوریہ مندر کی زیارت کے لیے پہنچی تھیں، جہاں ڈیوٹی پر موجود خاتون پولیس اہلکار سویتا نے انہیں مقررہ قطار میں کھڑے ہونے کے لیے کہا۔ اس بات پر دونوں کے درمیان مبینہ طور پر بحث شروع ہو گئی۔

بتایا جاتا ہے کہ بحث کے دوران ایشوریہ نے خاتون پولیس اہلکار کو مبینہ طور پر گال پر تھپڑ مار دیا، جس کے بعد مندر کے احاطے میں ہلچل مچ گئی۔

خاتون پولیس اہلکار کی شکایت کی بنیاد پر ایشوریہ کے خلاف مقدمہ درج کر لیا گیا ہے۔ پولیس نے واقعے کی تحقیقات شروع کر دی ہیں اور معاملے کی مزید جانچ کی جا رہی ہے۔

مزید تفصیلات کا انتظار ہے۔