’محرم جلوسوں میں فلسطینی پرچم لہرانے والوں کے خلاف کیسس واپس لئے جائیں‘

نئی دہلی: سی پی آئی ایم نے جمعہ کے دن مطالبہ کیا کہ محرم جلوسوں کے دوران فلسطینی پرچم لہرانے والوں کے خلاف درج کیسس واپس لئے جائیں۔

اس نے بی جے پی زیرقیادت مرکزی حکومت سے کہا کہ وہ فلسطین کے ساتھ کھل کر اظہارِ یگانگت کرے۔

بایاں بازو جماعت نے نئی دہلی میں جاری بیان میں کہا کہ فلسطینی پرچم لہرانے پر حراست میں لئے گئے یا گرفتار کردہ افراد کو رہا کردینا چاہئے۔

پارٹی نے دعویٰ کیا کہ ایسے کیسس زیادہ تر ان ریاستوں میں درج ہوئے ہیں، جہاں بی جے پی کی حکومت ہے۔

پارٹی نے کہا کہ جموں و کشمیر، بہار، مدھیہ پردیش اور جھارکھنڈ میں یو اے پی اے اور بی این ایس کے تحت کیسس بی جے پی اور بی ایچ پی قائدین کی شکایت پر درج ہوئے۔

بی جے پی حکومت ریاست ِ فلسطین کی تائید کرنے کا دعویٰ کرتی ہے، لیکن یہ کیسس اس کا اصل چہرا بے نقاب کردیتے ہیں۔ بایاں بازو جماعت نے کیسس واپس لینے اور زیرحراست یا گرفتار افراد کی فوری رہائی کا مطالبہ کیا۔