مرکز مناسب وقت پر جموں وکشمیر کا ریاست کا درجہ بحال کرے گا: کشن ریڈی

حیدرآباد (پی ٹی آئی) مرکزی وزیر جی کشن ریڈی نے جمعہ کے روزکہا کہ جموں وکشمیر کے ریاست کے درجہ کی بحالی کے مطالبہ پر مرکز مناسب وقت پر ردعمل کا اظہارکرے گا۔

تاہم انہوں نے کہا کہ جموں و کشمیر کے لئے آرٹیکل370 دوبارہ واپس نہیں لایاجائے گا۔ نیشنل کانفرنس پارٹی کی جانب سے ریاست کے درجہ کی بحالی کی مساعی سے متعلق اطلاعات پر ردعمل کا اظہارکرتے ہوئے کشن ریڈی نے یہ بات کہی۔

وہ یہاں صحافیوں سے بات چیت کررہے تھے۔ کشن ریڈی جو جموں وکشمیر کے اسمبلی الیکشن میں بی جے پی کے انچارج تھے‘ کہا کہ مرکزکی کوششوں سے ریاست میں پرامن طورپرانتخابات کرائے گئے اور اب مکررانتخابات کی ضرورت نہیں ہے۔

بی جے پی کے مظاہرہ کو شانداربتاتے ہوئے انہوں نے کہا کہ پارٹی کو سابق کے مقابلہ میں زائدنشستیں ملی ہیں۔