کانگریس کو اقتدار کی خواہش کے علاوہ عوامی بہبود کی کوئی پرواہ نہیں:سکھیندرریڈی

حیدرآباد: تلنگانہ قانون ساز کونسل کے صدرنشین جی سکھیندرریڈی نے الزام لگایا کہ کانگریس پارٹی کو اقتدار کی خواہش کے علاوہ عوامی بہبود کی کوئی پرواہ نہیں ہے۔

کرناٹک انتخابات کے بعد کانگریس پارٹی کا رویہ عجیب و غریب رہا ہے۔

انہوں نے کہاکہ مرکز میں کانگریس کی ناکامی کی وجہ سے ہی بی جے پی اقتدار میں آئی ہے۔

کانگریس کے لیڈروں کا دورہ تلنگانہ اور وزیراعلی کے چندرشیکھرراو پر تنقید مضحکہ خیز ہے۔

نلگنڈہ کے کیمپ آفس میں میڈیا سے بات کرتے ہوئے انہوں نے کہاکہ کانگریس کی حکومت والی ریاستوں میں مناسب وظیفہ کی رقم کیوں نہیں دی جارہی ہے۔

انہوں نے واضح کیا کہ کے سی آر کی حکومت میں ہی تلنگانہ ریاست خوشحال ہوگی۔

انہوں نے کہاکہ بی جے پی کی بی پارٹی کون ہے یہ سب ہی واقف ہیں۔

کانگریس پارٹی میں کوئی موثر لیڈر نہیں ہے۔

کانگریس کے لیڈر اب بھی ہوش میں نہیں آ رہے ہیں۔

کانگریس پارٹی کو گھوٹالوں کی عادت ہوگئی ہے۔انہوں نے کہاکہ کے سی آر واحد لیڈر ہیں جو بی جے پی سے لڑ سکتے ہیں۔