حیدرآباد میں سڑک پر نوجوانوں کے خطرناک بائیک اسٹنٹس

حیدرآباد: حیدرآباد شہر میں شام ہوتے ہی کچھ نوجوان بائیکوں پر خطرناک کرتب (اسٹنٹس) کرتے ہوئے سڑکوں پر ہلچل مچا رہے ہیں۔ حالیہ دنوں میں شہر کے مختلف علاقوں میں اسٹنٹس کرتے ہوئے پکڑے گئے نوجوانوں کے خلاف پولیس نے کارروائی بھی کی، لیکن اس کے باوجود یہ نوجوان عناصر باز نہیں آ رہے۔

تازہ واقعہ حیدرآباد کے آرام گھر فلائی اوور پر پیش آیا، جہاں رات کے وقت کچھ نوجوان اسکُوٹیوں پر خطرناک اسٹنٹس کرتے نظر آئے۔ انہوں نے نہ صرف اپنی زندگی کو خطرے میں ڈالا بلکہ دوسرے راہگیروں اور گاڑی چلانے والوں کو بھی پریشانی میں مبتلا کر دیا۔

یہ نوجوان ریلز بنانے کے لیے ویڈیوز بھی بنا رہے تھے۔ کسی نے بھی ہیلمٹ نہیں پہنا تھا، ٹریفک کے قوانین کی کھلی خلاف ورزی کرتے ہوئے اسکُوٹیاں چلاتے رہے۔ یہ سارا منظر کیمرے میں قید ہو گیا اور ویڈیو سوشل میڈیا پر تیزی سے وائرل ہو گئی۔

شہریوں نے اس واقعہ پر سخت ردعمل ظاہر کیا اور ایسے افراد کے خلاف سخت کارروائی کا مطالبہ کرتے ہوئے پولیس سے رجوع کیا ہے۔