پرانے شہر میں غیر قانونی تارکین وطن کے خلاف کارروائی کا مطالبہ: راجہ سنگھ

حیدرآباد: گوشہ محل اسمبلی حلقہ سے بی جے پی کے رکن اسمبلی راجہ سنگھ نے چیف منسٹر تلنگانہ ریونت ریڈی کو ایک تحریری نمائندگی پیش کی ہے، جس میں انہوں نے حیدرآباد کے شہر علاقوں میں بغیر درست دستاویزات کے رہنے والے غیر قانونی تارکین وطن کے خلاف فوری کارروائی کا مطالبہ کیا ہے۔

راجہ سنگھ نے زور دے کر کہا کہ حکومت کو ان افراد کی شناخت کرنی چاہیے جو غیر قانونی طور پر پرانی شہر کے مختلف علاقوں میں مقیم ہیں اور ان کے خلاف قانونی کارروائی عمل میں لائی جانی چاہیے۔ ان کا کہنا تھا کہ اس معاملے کو نظر انداز کرنا ریاست کی سلامتی اور عوامی امن و امان کے لیے خطرہ بن سکتا ہے۔

ایم ایل اے نے چیف منسٹر سے گزارش کی کہ وہ متعلقہ محکموں کو ہدایت دیں کہ وہ فوری طور پر ان غیر قانونی تارکین وطن کی نشاندہی کریں، ان کے دستاویزات کی جانچ کریں، اور قانون کے مطابق کارروائی کریں تاکہ شہر میں امن و امان برقرار رکھا جا سکے۔