کے سی آر کی وجہ سے سدی پیٹ تک ٹرین سروس کا خواب پورا ہوا: ہریش راؤ

حیدرآباد: وزیر خزانہ ٹی ہریش راؤ نے کہا کہ سدی پیٹ تک ٹرین سروس کا خواب پورا ہوگیا ہے اور اس کا سارا کریڈٹ چیف منسٹر کے چندر شیکھر راؤ کو جاتا ہے۔

سکندرآباد اور سدی پیٹ کے درمیان ٹرین سروس کے آغاز کے موقع پر منگل کو سدی پیٹ میں میڈیا سے بات کرتے ہوئے جس کو وزیر اعظم نریندر مودی نے نظام آباد سے عملی طور پر ہری جھنڈی دکھا کر روانہ کیا، وزیر ہریش راؤ نے کہا کہ سابقہ آندھرا پردیش میں آنے والی حکومتوں نے سدی پیٹ تک ٹرین سروس کے مطالبے کو نظر انداز کیا اور اپوزیشن پارٹیوں نے بھی کئی مواقع پر جھوٹے وعدے کئے کہ ٹرین کی سہولت سدی پیٹ تک پہنچائی جائے گی لیکن بے سود۔

ہریش راؤ نے کہا کہ سدی پیٹ تک ریلوے لائن کی منظوری 2006 میں اس وقت دی گئی تھی جب کے چندر شیکھر راؤ یو پی اے حکومت میں مرکزی وزیر تھے اور ریاست تلنگانہ کی تشکیل کے بعد بی آر ایس حکومت نے اس پروجیکٹ کی تکمیل میں اپنا 33 فیصد حصہ ادا کیا تھا۔

انہوں نے سدی پیٹ شہر میں ٹرین آنے کا کریڈٹ لینے کے لئے بی جے پی قائدین پر بھی تنقید کی اور افتتاحی تقریب کے دوران چیف منسٹر کے چندر شیکھر راؤ کی تصویر آویزاں نہ کرنے کے لئے بھی مرکزی حکومت کو قصوروار ٹھہرایا۔