تلنگانہ کی معاشی صورتحال، بی آر ایس حقیقی پیپر جاری کرے گی

حیدرآباد: بی آر ایس نے ریاست کی معاشی صورتحال اور گزشتہ9سالوں کے دوران بی آر ایس حکومت کی جانب سے حاصل کردہ قرض اور دیگر تفصیلات پر مشتمل حقیقی پیپر کی اجرائی 24 دسمبر تک ملتوی کردی ہے۔

واضح رہے کہ حالیہ اسمبلی اجلاس کے دوران کانگریس حکومت نے بی آر ایس دور حکومت میں محکمہ فینانس اور آبپاشی میں مبینہ بدعنوانیوں اور بے قاعدگیوں اور ریاست پر موجود قرض کی تفصیلات پر مبنی وائٹ پیپر جاری کیا تھا۔

 بی آر ایس کی جانب سے اس وائٹ پیپر کو جھوٹ کا پلندہ قرار دیتے ہوئے موجودہ حکومت کی جانب سے سابق حکومت کو بدنام کرنے کی مذموم کو شش قرار دیا تھا۔ بی آر ایس نے کانگریس حکومت کے وائٹ پیپر کے جواب میں حقیقی پیپر جاری کرنے کا فیصلہ کیا تھا۔

اس فیصلہ کی رو سے آج حقیقی پیپر جاری کیا جانا تھا مگر نامعلوم وجوہات کی بنا پر پیپر کی اجرائی کل تک ملتوی کردی گئی۔ اب بی آر ایس اپنا حقیقی پیپر اتوار کے دن جاری کرے گی۔ بتایا جارہا ہے کہ اس پیپر میں حکومت کے تمام الزامات کا جواب رہے گا۔