ممبئی میں خاتون منشیات فروش کائنات شیخ پہلی بار مکوکا کے تحت گرفتار

ممبئی: ممبئی پولیس نے منشیات ضبطی کے ایک بڑے معاملے میں پہلی مرتبہ مہاراشٹر کنٹرول آف آرگنائزڈ کرائم ایکٹ (مکوکا) کا اطلاق کیا ہے۔ پولیس نے 26 سالہ کائنات شیخ نامی خاتون کو گرفتار کرلیا جو منشیات کی ترسیل کے ایک منظم نیٹ ورک کی مبینہ ماسٹر مائنڈ قرار دی جارہی ہے۔

باندرہ اینٹی نارکوٹکس سیل (اے این سی) نے کائنات کو شہر کے مضافات دہیسر میں اس کی بہن کے گھر سے گرفتار کیا، جہاں وہ اپنے بھتیجے عدنان شیخ کی گرفتاری کے بعد روپوش ہوگئی تھی۔

اطلاعات کے مطابق کائنات اور عدنان ایک ایسا نیٹ ورک چلا رہے تھے جس میں پورٹرز کے ذریعے میفیڈرون (ایم ڈی) کے چھوٹے پیکٹ محفوظ طریقے سے پہنچائے جاتے تھے تاکہ پولیس کی نظروں سے بچا جاسکے۔

پولیس کا کہنا ہے کہ کائنات کی گرفتاری سے انہیں مفرور گینگ لیڈر ضمیر احمد انصاری عرف جمیر بوکا تک رسائی میں مدد ملے گی، جس پر شہر میں منشیات کا سنڈیکیٹ چلانے کا شبہ ہے۔

مزید تحقیقات سے یہ بھی انکشاف ہوا کہ کائنات کے شوہر جبار قریشی، جو بائیکلہ کے رہائشی ہیں، کو کچھ ماہ قبل 500 گرام ایم ڈی کے ساتھ گرفتار کیا گیا تھا اور وہ فی الحال جیل میں ہیں۔ شوہر کی گرفتاری کے بعد کائنات نے مبینہ طور پر عدنان کی مدد سے ریکیٹ کی سرگرمیاں سنبھال لیں اور نیٹ ورک کو مزید پھیلایا۔

پولیس نے بتایا کہ یہ پورا سنڈیکیٹ اس وقت منظر عام پر آیا جب عدنان شیخ کی گرفتاری عمل میں آئی اور اس دوران تقریباً 2 کروڑ روپے مالیت کی منشیات ضبط کی گئیں۔ اس کی پوچھ گچھ نے کائنات تک تفتیش کاروں کو پہنچا دیا۔ اس سے قبل باندرہ این سی یونٹ نے این ڈی پی ایس ایکٹ 1985 کی دفعہ 8(سی) اور 22(سی) کے تحت 766 گرام ایم ڈی ضبط کرتے ہوئے مقدمہ درج کیا تھا۔

سینئر افسران کی منظوری کے بعد پولیس نے کائنات کے خلاف مکوکا کی دفعات 3(1)(ii) ، 3(2) اور 3(4) کے تحت مقدمہ درج کیا۔ یہ ممبئی پولیس کی تاریخ میں پہلا موقع ہے کہ منشیات ضبطی کے کسی معاملے میں مکوکا نافذ کیا گیا ہے۔

واضح رہے کہ وزیر اعلیٰ دیوندر فڑنویس نے ریاستی اسمبلی میں سماج وادی پارٹی کے رکن اسمبلی ابوعاصم اعظمی کے مطالبے پر اعلان کیا تھا کہ منشیات فروشوں کے خلاف سخت کارروائی کے لیے مکوکا کا اطلاق کیا جائے گا۔