حیدرآباد میں ’گپت ندھی‘ کے نام پر دھوکہ دہی کا ریاکٹ بے نقاب، 11 افراد سے ایک کروڑ روپے ہتھیانے والے 4 گرفتار

حیدرآباد: حیدرآباد پولیس نے ’گپت ندھی‘ (زیرِ زمین چھپے خزانے) کی تلاش کا جھانسہ دے کر لوگوں سے دھوکہ دہی کرنے والے ایک گروہ کو بے نقاب کرتے ہوئے چار ملزمین کو گرفتار کرلیا۔ پولیس کے مطابق ملزمین نے مختلف علاقوں میں 11 افراد کو دھوکہ دے کر تقریباً ایک کروڑ روپے ہتھیائے۔

یہ کارروائی کمشنر ٹاسک فورس، شمش آباد زون نے راجندر نگر پولیس کے ساتھ مل کر انجام دی۔ گرفتار ملزمین کے قبضے اور ان کی نشاندہی پر پولیس نے گاڑیاں، موبائل فون، نقلی سونے کے سکے اور دیگر اشیاء ضبط کیں۔

گرفتار ملزمین کی شناخت محمد منور عرف منا (36)، ساکن گڈی ملکاپور؛ سید علی اشرف (40)، ساکن فرحان نگر، جواہر نگر؛ محمد حاجی (25)، ساکن بالاجی نگر، جواہر نگر؛ اور محمد سلمان (29)، ساکن یادگیری پلی، کیسیرا منڈل کے طور پر کی گئی ہے۔

پولیس کے مطابق اہم ملزم محمد منور نے مبینہ طور پر اپنی آمدنی ناکافی ہونے کے بعد آسانی سے پیسہ کمانے کے لیے لوگوں کو دھوکہ دینے کا منصوبہ بنایا۔ اس نے اپنے ساتھیوں سید علی اشرف، محمد حاجی اور محمد سلمان کو اپنے منصوبے میں شامل کیا۔

ملزمین مبینہ طور پر معصوم اور بھولے بھالے افراد سے رابطہ کرتے اور دعویٰ کرتے تھے کہ انہیں گھروں کے نیچے دفن خفیہ خزانے کا پتہ لگانے کا خصوصی علم حاصل ہے۔ وہ متاثرین کو یقین دلاتے کہ ان کے گھروں یا احاطوں میں قیمتی خزانہ دفن ہے۔

پولیس کے مطابق ملزمین زمین کھودنے کے بعد کوئلے سے بھری بوری اور نقلی سونے کے سکے وہاں دفن کردیتے تھے۔ بعد ازاں متاثرین سے کہا جاتا کہ کوئلے کو سونے میں تبدیل ہونے میں کچھ وقت لگے گا۔ اس کے بعد ملزمین موقع سے فرار ہوجاتے تھے۔

پولیس نے ملزمین کے قبضے سے دو کاریں، ایک آٹو رکشا، دو موٹر سائیکلیں، چار موبائل فون، 25 نقلی سونے کے سکے، 6 کلو کوئلہ، 4 کلو مٹی اور پوجا کا سامان ضبط کیا ہے۔

اس معاملے میں راجندر نگر پولیس اسٹیشن میں کرائم نمبر 916/2026 کے تحت بھارتیہ نیائے سنہتا (BNS) کی دفعات 318(4)، 351(2)، 61(2) معہ 3(5) کے تحت مقدمہ درج کیا گیا ہے۔ پولیس مزید تحقیقات کر رہی ہے۔

پولیس کی عوام سے اپیل

پولیس نے عوام کو خبردار کیا ہے کہ حالیہ دنوں میں بعض دھوکہ باز افراد گلیوں، دیہات اور مختلف علاقوں میں گھوم کر زیرِ زمین چھپے خزانے کی موجودگی کا دعویٰ کرتے ہوئے لوگوں کو اپنے جال میں پھنسا رہے ہیں۔

پولیس نے عوام سے اپیل کی ہے کہ ایسے افراد کے جھانسے میں نہ آئیں اور کسی بھی شخص کی جانب سے خفیہ خزانے کے نام پر رقم طلب کیے جانے یا مشتبہ سرگرمیوں میں ملوث ہونے کی صورت میں فوری طور پر پولیس کو اطلاع دیں۔