اے سی کوچ میں لڑکی کی سگریٹ نوشی (ویڈیو)

وشاکھاپٹنم: وشاکھاپٹنم۔گاندھی دھام سوپرفاسٹ ایکسپریس (20803) میں پیش آیا ایک واقعہ ان دنوں سوشل میڈیا پر خوب وائرل ہو رہا ہے۔ اس ویڈیو میں دیکھا جاسکتا ہے کہ اے سی کوچ میں ایک نوجوان لڑکی سگریٹ پی رہی ہے اور دیگر مسافروں کے ساتھ تکرار میں الجھ گئی ہے۔ اس منظر کو ریکارڈ کرکے سوشل میڈیا پر اپ لوڈ کیا گیا جس پر خوب چرچا ہو رہی ہے۔

ویڈیو میں صاف نظر آتا ہے کہ لڑکی سگریٹ پی رہی تھی کہ اسی دوران ایک نوجوان مسافر نے اس سے سوال کرتے ہوئے ویڈیو ریکارڈ کرنا شروع کردیا۔ اس نے پوچھا آپ یہ کیا کر رہی ہیں؟ ٹرین کے اندر سگریٹ کیوں پی رہی ہیں؟ کیا یہ اے سی کوچ آپ کو نظر نہیں آرہا؟”

یہ سن کر اور ویڈیو بنتے دیکھ کر لڑکی بھڑک اُٹھی۔ اس نے اعتراض کرتے ہوئے کہاکہ آپ میری ویڈیو کیوں بنا رہے ہیں؟ فوراً ڈیلیٹ کریں اور ساتھ ہی نوجوان کو ڈرانے دھمکانے لگی۔ تاہم جب ویڈیو بنانے والا مسافر ویڈیو ڈیلیٹ کرنے پر تیار نہ ہوا تو لڑکی مزید غصے میں آ گئی اور کہا کہ اس میں تمہیں کیا مسئلہ ہے بھائی؟ یہ تمہاری ٹرین تو نہیں ہے نا۔ میرے ہاتھ میں جو سگریٹ ہے وہ میں نے اپنے پیسوں سے خریدی ہے، تمہیں اس سے کیا؟”

सिगरेट पीने की तलब, बेईज्जत करवा देती हैं. वायरल वीडियो में चलती ट्रेन में इस तरह धूम्रपान करेगी तो सामने वाला आपकी करतूतों को दिखाएगा?@RailMinIndia pic.twitter.com/mXHxy0715s

— Tushar Rai (@tusharcrai) September 15, 2025

اس دوران دیگر مسافروں نے بھی مداخلت کی اور لڑکی کو سمجھانے کی کوشش کی کہ اے سی کوچ میں سگریٹ نوشی ممنوع ہے، براہِ کرم سگریٹ بجھا دیں۔ لیکن وہ باز نہ آئی اور دوبارہ کہا کہ "یہ تمہاری ٹرین نہیں ہے، تمہیں اتنی تکلیف کیوں ہو رہی ہے؟”

بحث و تکرار بڑھتی دیکھ کر دیگر مسافروں کو بھی غصہ آیا۔ وہ اس بات پر برہم ہوگئے کہ لڑکی اپنی غلطی ماننے کے بجائے الٹا مسافروں کو ہی چیلنج کر رہی ہے۔ اسی دوران لڑکی اپنی برتھ پر جا کر بیٹھ گئی اور کہا کہ اب پولیس کو بُلالو، دیکھتے ہیں کیا ہوتا ہے۔

یہ ویڈیو کب ریکارڈ کیا گیا، اس کی تاریخ اور وقت کی وضاحت ابھی تک سامنے نہیں آئی۔ البتہ یہ ویڈیو تیزی سے سوشل میڈیا پر وائرل ہو رہا ہے۔ فی الحال ریلوے حکام کی جانب سے اس واقعہ پر کوئی باضابطہ بیان یا وضاحت جاری نہیں کی گئی ہے۔