سرمایہ کاروں کیلئے خوشخبری: اس ملک میں 10 سالہ گولڈن رہائش پروگرام متعارف

مسقط: خلیجی ملک عمان نے غیر ملکی سرمایہ کاروں اور ہنرمند افراد کے لیے ایک بڑا اعلان کیا ہے۔ سلطنت عمان نے 10 سالہ ’گولڈن رہائش پروگرام‘ متعارف کرایا ہے۔

یہ پروگرام عمان کے ویژن 2040 کا حصہ ہے، جس کا مقصد سیاحت، صنعت اور تجارت کو نئی رفتار دینا ہے۔

اس منصوبے کے تحت غیر ملکی سرمایہ کار اگر صرف دو لاکھ عمانی ریال یعنی تقریباً پانچ لاکھ بیس ہزار امریکی ڈالر کی سرمایہ کاری کریں، تو انہیں دس سالہ رہائش اجازت نامہ ملے گا… جو قابلِ تجدید ہوگا۔

اہم بات یہ کہ اس پروگرام کے تحت سرمایہ کار کے افراد خاندان اور قریبی رشتہ دار بھی اس سہولت سے فائدہ اٹھا سکیں گے۔

گولڈن رہائش رکھنے والوں کو خصوصی سہولتیں ملیں گی… ائیرپورٹ پر فاسٹ ٹریک سروس… تین گھریلو ملازمین رکھنے کا حق… اور مخصوص علاقوں میں جائیداد خریدنے کی اجازت ہوگی۔

حکام کے مطابق اس پروگرام کے لیے سرمایہ کار سات مختلف طریقوں سے اہل ہو سکتے ہیں… جن میں کمپنی قائم کرنا، سیاحتی کمپلیکس میں پراپرٹی خریدنا، طویل مدتی بانڈز رکھنا، ایکوئٹی میں سرمایہ کاری، پانچ سالہ بینک ڈپازٹ، کم از کم پچاس عمانی ملازمین کے ساتھ کمپنی قائم کرنا اور غیر ملکی سرمایہ کاری قانون کے تحت نامزدگی شامل ہیں۔

وزارت تجارت و سرمایہ کاری عمان کا کہنا ہے کہ یہ پروگرام محض رہائش کا منصوبہ نہیں… بلکہ ایک بہتر زندگی، استحکام اور کاروباری مواقع کا نیا دروازہ ہے۔

یہ ہے عمان کا گولڈن رہائش پروگرام… جو خلیجی خطے میں سرمایہ کاری کے نئے امکانات پیدا کر رہا ہے۔”