پہلوانوں کا مسئلہ‘ سپریم کورٹ کی نوٹس

نئی دہلی: سپریم کورٹ نے منگل کے دن ملک کے سرکردہ 7 پہلوانوں کی درخواست پر نوٹس جاری کی جو چاہتے ہیں کہ ریسلنگ فیڈریشن آف انڈیا(ڈبلیو ایف آئی) کے سربراہ برج بھوشن شرن سنگھ کے خلاف ایف آئی آر درج کرنے کی ہدایت دی جائے۔

چیف جسٹس ڈی وائی چندرچوڑ اور جسٹس پی ایس نرسمہا پر مشتمل بنچ نے کہا کہ انٹرنیشنل ریسلرس نے جنسی ہراسانی کے سنگین الزامات عائد کئے ہیں۔ جمعہ کو قابل واپسی نوٹس جاری کی جائے۔

سینئر وکیل کپل سبل اور نریندر ہوڈا نے ریسلرس کی نمائندگی کرتے ہوئے بنچ کے سامنے معاملہ رکھا۔ کپل سبل نے کہا کہ یہ پہلوانوں کا معاملہ ہے جو دھرنا دے رہے ہیں۔ 7 عورتوں نے شکایت کی ہے اور ایک کمسن ہے۔