تلنگانہ کو عالمی سطح کا انوویشن ہب بنانے حکومت کا عزم:وزیرآئی ٹی سریدھربابو

حیدرآباد: تلنگانہ کے وزیر آئی ٹی سریدھربابو نے کہا ہے کہ تلنگانہ کو عالمی سطح کا انوویشن ہب بنانے کا حکومت عزم رکھتی ہے۔

انہوں نے بتایا کہ آسٹریلیا کے دورہ کے دوران ریاستی حکومت نے ملبورن کی سرکردہ یونیورسٹی آرایم آئی ٹی کے ساتھ لیٹرآف انٹنٹ پردستخط کئے۔

یہ معاہدہ لائف سائنس کے شعبہ میں جدت، تحقیق، ترقی، اعلیٰ تعلیم، اور صنعتوں کی ضروریات کے مطابق تیار ورک فورس پیدا کرنے جیسے شعبوں میں دو طرفہ تعاون کو فروغ دے گا۔ وزیر موصوف نے کہا کہ یہ معاہدہ مستقبل کی جینوم ویلی کے لئے ایک بلوپرنٹ کی طرح رہنمائی کرے گا۔

انہوں نے مزید کہا کہ ایشیا میں نمایاں مقام حاصل کر چکی تلنگانہ کی لائف سائنسس معیشت کو 2030 تک 250 بلین ڈالر کے ہدف تک پہنچانا ہمارا مقصد ہے۔

وزیرموصوف نے بتایا کہ عنقریب تلنگانہ لائف سائنسس اسکول کے قیام کے لئے خصوصی انتظامات کئے جا رہے ہیں۔