حیدرآباد کی ترقی کے لیے حکومت کی خصوصی توجہ۔ جوبلی ہلز میں کانگریس کا جھنڈا لہرایا جائے گا: وزیرٹرانسپورٹ تلنگانہ

حیدرآباد: تلنگانہ کے وزیر ٹرانسپورٹ پونم پربھاکر نے کہا ہے کہ عوام کے آشیرواد سے قائم ہونے والی کانگریس حکومت کئی فلاحی اقدامات انجام دے رہی ہے۔ انہوں نے کہا کہ خواتین کے لیے آر ٹی سی بسوں میں مفت سفر کے تحت اب تک 200 کروڑ مفت ٹکٹیں دی جا چکی ہیں جن کی مالیت 6800 کروڑ روپے ہے۔

حکومت 200 یونٹس تک مفت بجلی سربراہ کر رہی ہے جس سے لاکھوں خاندان مستفید ہو رہے ہیں۔ انہوں نے کہا کہ رعیتوبھروسہ اسکیم، قرض معافی، اور باریک چاول کے لیے 500 روپے بونس بھی فراہم کیا گیا ہے۔

انہوں نے کہا کہ غریب عوام کو اندرماں اماں مکانات فراہم کیے جا رہے ہیں۔ سابق حکومت نے حیدرآباد کے مضافاتی علاقہ کولور میں مکانات تعمیر کیے تھے جہاں لوگوں کی ملازمتیں نہیں ہیں، اسی لیے حکومت اب ایسے مقامات پر ہی مکانات تعمیر کرنے کا منصوبہ بنا رہی ہے جہاں عوام رہائش پذیر ہیں۔ اراضی رکھنے والوں کو مکان کی منظوری دی جا رہی ہے اور جن کے پاس اراضی نہیں ہے، ان کے لیے بھی منصوبہ بنایا جا رہا ہے۔

حیدرآباد کے جوبلی ہلز میں کانگریس لیڈران محمد اظہر الدین اور نوین یادو کے ساتھ پریس کانفرنس سے خطاب کرتے ہوئے

انہوں نے بتایا کہ حیدرآباد کے 15 اسمبلی حلقوں میں نئے راشن کارڈس جاری کیے جا رہے ہیں۔ تقریباً 50 ہزار راشن کارڈس کی تصدیق مکمل ہو چکی ہے اور ان کی تقسیم جلد کی جائے گی۔ یہ تمام کارڈز اہلیت کی بنیاد پر جاری کیے گئے ہیں، سیاسی مداخلت نہیں کی گئی۔ ریاست کی تشکیل کے بعد گزشتہ دس برسوں میں ایک بھی نیا راشن کارڈ جاری نہیں ہوا تھا۔

انہوں نے کہا کہ حکومت نے گرلز اور بوائز گُرُوکل اسکولوں میں میس چارجس میں اضافہ کیا ہے اور باریک چاول صرف امیروں کے لیے نہیں بلکہ غریبوں میں بھی تقسیم کیا جا رہا ہے۔ حیدرآباد شہر کی ترقی کے لیے حکومت خصوصی توجہ دے رہی ہے، متعدد فلائی اوورس، انڈر پاس، پارکس اور ڈرینج سسٹم تعمیر کیے جا رہے ہیں۔

پوننم پربھاکر نے نشاندہی کی کہ ریاست کی تشکیل کے بعد سے حیدرآباد کو کرشنا اور گوداوری کے سوا کوئی نئی آبی سہولت حاصل نہیں ہوئی۔ موجودہ حکومت گوداوری فیز 2 کے تحت 15 ٹی ایم سی پانی لانے کے اقدامات کر رہی ہے۔

حیدرآباد میں زیر زمین پانی کی سطح بڑھانے کے لیے واٹر ہارویسٹنگ پر شعور بیدار کیا جا رہا ہے، اور شہر کو آلودگی سے پاک بنانے کی مہم جاری ہے۔ رنگ روڈ کے اندر صرف EV، CNG، اور LPG آٹو کو اجازت دی جا رہی ہے، اور آر ٹی سی بسوں کو بتدریج الیکٹرک بسوں میں تبدیل کیا جا رہا ہے۔

انہوں نے عوام سے اپیل کی کہ جوبلی ہلز ضمنی انتخابات میں ترقیاتی خدمات کے لیے کانگریس امیدوار کو کامیاب بنائیں۔ انہوں نے کہا کہ گزشتہ دس برسوں سے عوامی مسائل کو نظرانداز کیا گیا جس کے ازالہ کے لیے موجودہ حکومت سرگرم ہے۔ وزیراعلیٰ اور وزراء مل کر میدانِ عمل میں کام کر رہے ہیں۔

پونم پربھاکر نے کہا کہ جوبلی ہلز اسمبلی حلقہ سے کانگریس کا امیدوار مقامی ہی ہوگا اور تمام امیدوار مل کر کام کریں گے، ٹکٹ کس کو دینا ہے یہ پارٹی کا فیصلہ ہوگا۔ تمام اُمیدوار وارڈز میں سرگرم رہیں گے اور پارٹی کو مضبوط کریں گے، باہر کے کسی شخص کو ٹکٹ نہیں دیا جائے گا۔ جوبلی ہلز میں کانگریس کا جھنڈا لہرایا جائے گا۔ انہوں نے بتایا کہ امیدوار کے انتخاب کے لیے سروے کیا جا رہا ہے، جو بہتر ہوگا اُسے موقع دیا جائے گا۔

انہوں نے کہا کہ جس طرح سکندرآباد کنٹونمنٹ میں کانگریس نے کامیابی حاصل کی، اسی طرح جوبلی ہلز میں بھی کامیابی حاصل کریں گے۔ مقامی عوام سے جڑے، ان کی پہنچ میں رہنے والے افراد کو ٹکٹ دیا جائے گا۔

انہوں نے کہا کہ عوامی مسائل کا حل اور جوبلی ہلز اسمبلی حلقہ کی ترقی صرف کانگریس کی کامیابی سے ہی ممکن ہے، سب متحد ہوکر کانگریس کو کامیاب بنائیں۔واضح رہے کہ جوبلی ہلز کے بی آرایس رکن اسمبلی ماگنٹی گوپی ناتھ کی موت کے بعد اس حلقہ کا ضمنی انتخاب ہونے والا ہے۔