حیدرآباد: یوم جمہوریہ تقریب میں سابق وزیر داخلہ محمود علی بے ہوش (ویڈیو)

حیدرآباد: تلنگانہ کے پہلے مسلم وزیر داخلہ محمد محمود علی آج یوم جمہوریہ تقریب کے دوران اچانک بے ہوش ہوگئے۔

بی آر ایس پارٹی کے ہیڈکوارٹرس تلنگانہ بھون میں آج 26 جنوری کے موقع پر یوم جمہوریہ تقریب منائی جارہی تھی جہاں پارٹی کے ورکنگ پریسیڈنٹ اور سابق ریاستی وزیر کے ٹی راما راؤ نے پرچم لہرایا۔

اس موقع پر پارٹی کے کئی قائدین موجود تھے۔ تقریب جاری تھی کہ سابق وزیر داخلہ محمود علی اچانک غش کھا کر گر پڑے۔ تاہم قریب میں موجود ان کے ساتھی قائدین اور پارٹی کارکنوں نے انہیں فوری اٹھا تو لیا تاہم وہ بے ہوش ہوچکے تھے۔

اس واقعہ کا ایک ویڈیو سوشیل میڈیا پر وائرل ہوگیا جس میں دیکھا جاسکتا ہے کہ محمود علی پارٹی کارکنوں کے ہاتھوں میں جھول رہے ہیں۔ انہیں فوری طور پر قریبی دواخانہ لے جایا گیا جہاں ڈاکٹرس نے ان کا معائنہ کیا۔

بعد ازاں ڈاکٹرس نے ایک بیان جاری کرتے ہوئے بتایا کہ محمود علی کی حالت مستحکم ہے۔