ایک لاکھ مقامات پر ہنومان چالیسہ پاٹھ مراکز شروع کیے جائیں گے: ڈاکٹر توگڑیا

ماؤنٹ ابو: بین الاقوامی ہندو کونسل کے قومی صدر ڈاکٹر پراوین توگڑیا نے کہا کہ پریاگ راج میں آئندہ مہاکمبھ تک ایک لاکھ مقامات پر ہنومان چالیسہ پاٹھ کے مراکز شروع کرنے کا ہدف ہے۔

ڈاکٹر توگڑیا نے یہاں ہندو کانفرنس کے افتتاحی اجلاس میں کہا کہ اس وقت پورے ملک میں 13 ہزار مقامات پر ہنومان چالیسہ پاٹھ کے مراکز چل رہے ہیں، ان مراکز کے ذریعے ایک کروڑ ہندووں کو تنظیم سے جوڑا جائے گا۔ اس کے لیے ہر صوبے کو تین ہزار ہنومان چالیسہ مراکز کا ہدف دیا گیا ہے۔

نوجوان خواتین کی تنظیم اوجاسوینی کی قومی صدر رجنی ٹھکرال نے کہا کہ پورے ملک میں بہنوں کا کام بڑھ رہا ہے۔ اس بار ویمن سیفٹی مہم کے تحت 25 صوبوں کے 123 اسکولوں اور کالجوں میں لڑکیوں کو بیدار کیا گیا۔ 200 مقامات پر بہنوں کی میٹنگز منعقد کیں اور صحت سے متعلق معلومات دیں۔ اس بار سیلف ڈیفنس کیمپ کا انعقاد کیا جا رہا ہے، جس میں بہنوں کو کٹار دکشا اور تلوار دکشا دی جائے گی۔

انڈیا ہیلپ لائن کے قومی جنرل سکریٹری ہیمنت ترویدی نے اپنے خطاب میں کہا کہ ہندو ہیلپ لائن ہندوستان کے 38 میں سے 22 صوبوں میں اچھا کام کر رہی ہے۔ چھ صوبوں میں کام زور پکڑ رہا ہے۔ اس وقت 10 ہزار ڈاکٹرز اپنی خدمات فراہم کر رہے ہیں۔

راشٹریہ بجرنگ دل کے جنرل سکریٹری رام جی تیواری نے کہا کہ راشٹریہ بجرنگ دل نے پورے ملک کے 38 صوبوں میں اپنی موجودگی درج کرائی ہے۔ راشٹریہ بجرنگ دل قومی سطح پر اپنی شناخت قائم کرنے والی ملک گیر تنظیم بن گئی ہے۔ پورے ہندوستان کے دو کروڑ نوجوانوں کو راشٹریہ بجرنگ دل کی ویر ہندو، وجیتا ہندو ابھیان سے جوڑنے کا کام کیا جائے گا۔ ایک مٹھی اناج اسکیم کے ذریعے دو کروڑ ہندوؤں کو تنظیم سے جوڑا جائے گا۔ ایک کروڑ ہندو کنبوں سے مٹھی بھر اناج اکٹھا کرکے ایک کروڑ ضرورت مند ہندوؤں میں تقسیم کیا جائے گا۔

افتتاحی اجلاس میں اسٹیج پر موجود مرکزی عہدیداروں کا استقبال اے ایچ پی کے پیررام چوہان، راشٹریہ بجرنگ دل کے راکیش راج گرو، کلدیپ پرجاپتی، مکیش سین، درگارام دیواسی، راجکمار والمیکی پروین وشنو، ہتیش کمار نے کیا۔ کانفرنس میں ہندستان اور نیپال کے نمائندے شرکت کر رہے ہیں۔