ہاشم صفی الدین حزب اللہ کے نئے سربراہ بن سکتے ہیں؟
ہاشم صفی الدین اس وقت حزب اللہ کی ایگزیکٹو کونسل کے سربراہ ہیں اور تنظیم کے سیاسی امور کی نگرانی کرتے ہیں۔ وہ حزب اللہ کی جہاد کونسل کے بھی رکن ہیں جو گروپ کی فوجی کارروائیوں کا انتظام کرتی ہے۔
بیروت: حسن نصر اللہ کی شہادت کے بعد ہاشم صفی الدین کو حزب اللہ کے نئے سربراہ کے طور پر منتخب کیے جانے کا امکان ہے۔ روئٹرز کی رپورٹ کے مطابق، ہاشم صفی الدین اس وقت حزب اللہ کی ایگزیکٹو کونسل کے سربراہ ہیں اور تنظیم کے سیاسی امور کی نگرانی کرتے ہیں۔ وہ حزب اللہ کی جہاد کونسل کے بھی رکن ہیں جو گروپ کی فوجی کارروائیوں کا انتظام کرتی ہے۔
ہاشم صفی الدین کے حسن نصر اللہ کے ساتھ خاندانی تعلقات بھی ان کی قیادت کے لیے مضبوط بنیاد فراہم کرتے ہیں، کیونکہ وہ نصر اللہ کے خالہ زاد بھائی اور داماد ہیں۔ ان کی سیاسی اور فوجی امور میں گہری شمولیت اور حزب اللہ کے اندر ان کا اثر و رسوخ انہیں تنظیم کی قیادت کے لیے مضبوط امیدوار بناتا ہے۔
واضح رہے کہ 2017 میں امریکی محکمہ خارجہ نے ہاشم صفی الدین کو دہشت گرد قرار دیا تھا، تاہم ان کے حزب اللہ میں نمایاں مقام اور تجربے کی بنیاد پر، ان کے نئے سربراہ بننے کے قوی امکانات ہیں۔
