چلتی بس میں دل کا دورہ۔ڈرائیور کی موت۔ چوکسی سے مسافرین کی جان بچ گئی

حیدرآباد: چلتی آرٹی سی بس میں ڈرائیور کو دل کا دورہ پڑاتاہم ڈرائیورنے فوری چوکسی کامظاہرہ کرتے ہوئے بس کو سڑک کے کنارے روک دیاجس کے نتیجہ میں کئی مسافرین کی جان بچ گئی تاہم ڈرائیور کی علاج کے دوران اسپتال میں موت ہوگئی۔

تفصیلات کے مطابق تلنگانہ کے ضلع کھمم کے ستوپلی سے مسافرین کے ساتھ یہ بس جارہی تھی کہ اس ڈرائیور جس کی شناخت سرینواس راو کے طورپر کی گئی ہے، نے دل میں درد محسوس کیا اور چند لمحات ہی میں اس کو دل کا دورہ پڑا تاہم اس نے فوری چوکسی کامظاہرہ کرتے ہوئے بس کو سڑک کے کنارے روک دیا۔

اس کو مسافرین نے علاج کیلئے اسپتال منتقل کیاتاہم علاج کے دوران اس کی موت ہوگئی۔سرینواس کی اس چوکسی کے نتیجہ میں کئی مسافرین کی جان بچ گئی۔

آرٹی سی کے عہدیداروں نے اس کی موت پرگہرے دکھ اور افسوس کااظہار کیاتاہم انہوں نے اس کی چوکسی کی بھی ستائش کی۔ساتھ ہی انہوں نے سرینواس کے غمزدہ ارکان خاندان سے گہری تعزیت کا بھی اظہار کیا۔