حیدرآباد میں موسلا دھار بارش، کئی نشیبی علاقے زیر آب

حیدرآباد: گریٹر حیدرآباد کے مختلف علاقوں میں جمعرات کی شام سے موسلا دھار بارش کا سلسلہ جاری ہے، جس کے نتیجے میں کئی نشیبی علاقوں میں پانی جمع ہو گیا ہے اور ٹریفک کی روانی شدید متاثر ہوئی ہے۔

 شہری علاقوں میں بارش کے باعث معمولاتِ زندگی میں خلل پیدا ہو گیا ہے جبکہ متعدد مقامات پر پانی جمع ہونے سے عوام کو شدید مشکلات کا سامنا ہے۔

بارش سے متاثرہ علاقوں میں بنجارہ ہلز، جوبلی ہلز، فلم نگر، عنبرپیٹ، پنجہ گوٹہ، خیریت آباد، بیگم پیٹ، شیرلنگم پلی، منی کنڈہ، کوکٹ پلی، بالانگر، ایل بی نگر، راجندر نگر، مہدی پٹنم، بنڈلہ گوڑہ، حمایت ساگر، لنگر ہاؤس اور گنڈی پیٹ شامل ہیں، جہاں تیز بارش کے ساتھ گرج چمک بھی دیکھی گئی۔

اسی طرح سکندرآباد، الوال، حکیم پیٹ، سیتافل منڈی، اُپّل، رام نگر، چلکل گوڑہ، تارناکہ اور حبشی گوڑہ کے علاقوں میں بھی وقفے وقفے سے تیز بارش کا سلسلہ جاری ہے۔

محکمہ موسمیات کے مطابق شہر میں آئندہ چند گھنٹوں تک مزید بارش کا امکان ہے، جس کے پیشِ نظر شہریوں کو مشورہ دیا گیا ہے کہ وہ غیر ضروری طور پر گھروں سے باہر نہ نکلیں اور محفوظ راستوں کا انتخاب کریں۔

انتظامیہ نے ممکنہ ہنگامی صورتحال سے نمٹنے کے لیے جی ایچ ایم سی اور ڈیزاسٹر ریسپانس فورس (DRF) کی ٹیموں کو مکمل الرٹ کر دیا ہے۔

 شہریوں سے اپیل کی گئی ہے کہ وہ کسی بھی ناخوشگوار واقعے کی اطلاع قریبی کنٹرول روم یا ایمرجنسی ہیلپ لائن پر فوری دیں، تاکہ فوری کارروائی ممکن بنائی جا سکے۔