ممبئی میں موسلادھار بارش، آئی ایم ڈی نے 26 اور 27 اگست کو یلو الرٹ جاری کیا

ممبئی: اس مہینے کے آغاز میں مسلسل بارش کے بعد کچھ دن سکون ملنے پر پیر کی صبح ایک بار پھر ممبئی نے ہلکی سے درمیانی بارش کے ساتھ دن کا آغاز کیا۔ کئی علاقوں میں صرف ایک گھنٹے میں 20 ملی میٹر سے زیادہ بارش ریکارڈ کی گئی،

جس سے شہر میں ایک بار پھر برسات کا سلسلہ شروع ہو گیا۔ محکمہ موسمیات نے 26 اور 27 اگست، منگل اور بدھ کے لیے یلو الرٹ جاری کرتے ہوئے خبردار کیا ہے کہ ممبئی اور اس کے مضافاتی حصوں میں کہیں کہیں شدید سے انتہائی شدید بارش ہوسکتی ہے۔

برہان ممبئی میونسپل کارپوریشن کے اعداد و شمار کے مطابق اتوار صبح 8 بجے سے پیر صبح 7 بجے تک شہر میں اوسطاً 12.41 ملی میٹر، مشرقی مضافات میں 13.84 ملی میٹر اور مغربی مضافات میں 18.04 ملی میٹر بارش ریکارڈ کی گئی۔

پیر کی صبح 6 بجے سے 7 بجے کے دوران سب سے زیادہ بارش ہوئی۔ شہر کے وڈالا میں بی نادکرنی پارک میونسپل اسکول میں 29 ملی میٹر، سیوری کولیواڈا میونسپل اسکول میں 25 ملی میٹر اور دادر کی نکاسی آب ورکشاپ میں 24 ملی میٹر بارش ریکارڈ ہوئی۔ دھاراوی کے کالا قلعہ اسکول میں 19 ملی میٹر اور ورلی ناکہ میں 16 ملی میٹر بارش درج کی گئی۔

مشرقی مضافات میں مانکھرد فائر اسٹیشن پر 28 ملی میٹر، شیواجی نگر میونسپل اسکول اور نوتن ودیا مندر گوونڈی میں 24 ملی میٹر، جبکہ چیمبر فائر اسٹیشن اور مہاراشٹر نگر میں 23 ملی میٹر بارش ریکارڈ کی گئی۔ گھاٹ کوپر کے رمابائی اسکول میں بھی 21 ملی میٹر بارش ہوئی۔

اسی دوران مغربی مضافات میں بی کے سی فائر اسٹیشن پر 26 ملی میٹر، باندرہ کے پالی چمبائی میونسپل اسکول میں 23 ملی میٹر، سانتا کروز کے ناریال واڑی اسکول اور باندرہ کے سپاری ٹینک اسکول میں 22 ملی میٹر، اندھیری کے چکلا اسکول میں 17 ملی میٹر اور ایچ ای وارڈ میں 16 ملی میٹر بارش ریکارڈ ہوئی۔