چیف منسٹر کے آفس اور لوک بھون کو بم سے اڑانے کی دھمکی، حیدرآباد میں ہائی الرٹ جاری

حیدرآباد میں پیر کی صبح اس وقت سنسنی پھیل گئی جب تلنگانہ کے چیف منسٹر آفس (CMO) اور لوک بھون (راج بھون) کو ایک نامعلوم شخص کی جانب سے بم دھماکے کی دھمکی بھرا ای میل موصول ہوا۔ "واسوکی خان” نام سے بھیجے گئے اس ای میل میں دعویٰ کیا گیا کہ دونوں مقامات پر بم نصب کر دیے گئے ہیں اور کسی بھی وقت دھماکے کیے جا سکتے ہیں۔ ای میل موصول ہوتے ہی دونوں سرکاری دفاتر میں ہنگامی صورتحال پیدا ہوگئی اور فوراً اعلیٰ حکام کو اطلاع دی گئی۔

گورنر کے چیف سیکیورٹی آفیسر (CSO) سرینواس نے صورتحال کی سنگینی کو دیکھتے ہوئے براہِ راست پنجہ گوٹہ پولیس اسٹیشن پہنچ کر باضابطہ شکایت درج کرائی۔ پولیس نے فوراً مقدمہ درج کر کے تحقیقات کا آغاز کیا۔

دوسری جانب سی ایم او اور لوک بھون میں سخت ترین سیکیورٹی انتظامات کر دیے گئے۔ بم ڈٹیکشن اینڈ ڈسپوزل اسکواڈ (BDS)، اینٹی سبوٹاج ٹیمیں، ڈاگ اسکواڈ اور حیدرآباد ٹاسک فورس نے دونوں مقامات پر تقریباً تین گھنٹے تک مسلسل سرچ آپریشن جاری رکھا۔ مکمل تلاشی کے بعد پولیس نے بتایا کہ کہیں بھی بم یا مشکوک سامان نہیں ملا جس سے یہ امکان بڑھ گیا کہ دھمکی محض خوف پھیلانے کے مقصد سے دی گئی ہو۔

یہ بھی پڑھیں:’’ملک سے محبت ایمان کے خلاف نہیں‘‘ لوک سبھا میں ’وندے ماترم‘ پر بحث، اسد الدین اویسی کی زبردست تقریر: ویڈیو

سائبر کرائم ماہرین کی خصوصی ٹیم اس وقت ای میل کے آئی پی ایڈریس، سرور لوکیشن اور بھیجنے والے کی اصل شناخت معلوم کرنے میں مصروف ہے۔ پولیس کا کہنا ہے کہ بھیجنے والے کا سراغ ملتے ہی اس کے خلاف سخت کارروائی کی جائے گی۔

سی ایم او اور لوک بھون میں پیش آنے والی یہ بم دھمکی ای میل واردات سرکاری اداروں کی سیکیورٹی پر سنگین سوالات کھڑے کرتی ہے، جس کے بعد دونوں مقامات پر سیکیورٹی مزید سخت کر دی گئی ہے۔ معاملے کی تحقیقات جاری ہیں اور Munsif News 24×7 اس کیس سے متعلق ہر نئی پیش رفت آپ تک پہنچاتا رہے گا۔