بڑا حادثہ ٹل گیا، چیف منسٹر ریونت ریڈی کے قافلہ کی جامر گاڑی کا ٹائر پھٹ گیا
ٹائر پھٹنے کے باوجود ڈرائیور نے غیر معمولی مہارت کا مظاہرہ کرتے ہوئے گاڑی پر مکمل کنٹرول برقرار رکھا اور ایک بڑے سانحے کو ٹال دیا۔ اگر گاڑی بے قابو ہو جاتی تو پورے قافلے کو شدید خطرہ لاحق ہو سکتا تھا۔
حیدرآباد: تلنگانہ کے چیف منسٹر اے۔ ریونت ریڈی کے قافلے میں آج ایک بڑا حادثہ ہونے سے بال بال بچ گیا۔
تفصیلات کے مطابق، آؤٹر رنگ روڈ کے ایگزٹ نمبر 17 سے قافلہ گزر رہا تھا کہ اچانک سیکورٹی میں شامل جامر گاڑی کا پچھلا دائیں ٹائر تیز رفتار کے دوران زور دار دھماکے کے ساتھ پھٹ گیا۔
ٹائر پھٹنے کے باوجود ڈرائیور نے غیر معمولی مہارت کا مظاہرہ کرتے ہوئے گاڑی پر مکمل کنٹرول برقرار رکھا اور ایک بڑے سانحے کو ٹال دیا۔ اگر گاڑی بے قابو ہو جاتی تو پورے قافلے کو شدید خطرہ لاحق ہو سکتا تھا۔
واقعے کی اطلاع ملتے ہی ٹریفک ٹیم فوری طور پر موقع پر پہنچی اور جامر گاڑی کا ٹائر تبدیل کر دیا۔ حکام کے مطابق اس واقعے میں نہ کوئی جانی نقصان ہوا اور نہ ہی کوئی مالی خسارہ ہوا۔
سیکورٹی عملے نے اطمینان کا اظہار کرتے ہوئے کہا کہ ڈرائیور کی بروقت مہارت اور مستعدی کی وجہ سے ایک بڑی مشکل سے بچاؤ ممکن ہو سکا۔
چیف منسٹر کا قافلہ بعد ازاں معمول کے مطابق اپنی منزل کی جانب روانہ ہو گیا۔
