ہائی کمانڈ کا کونڈا سریکھا کو استعفیٰ دینے کا حکم، شام تک مہلت، برطرفی کا انتباہ

حیدرآباد: تلنگانہ کی وزیر کونڈا سریکھا کو کانگریس ہائی کمانڈ نے مبینہ طور پر وزارت سے استعفیٰ دینے کی ہدایت دی ہے۔ ذرائع کے مطابق انہیں خبردار کیا گیا ہے کہ اگر وہ جمعرات کی شام تک استعفیٰ پیش نہیں کرتیں تو ان کی برطرفی کا خط راج بھون بھیجا جا سکتا ہے۔

ذرائع کے مطابق کانگریس صدر ملکارجن کھرگے نے کونڈا سریکھا کو واضح طور پر وزارت کے عہدے سے استعفیٰ دینے کی ہدایت دی اور کہا کہ معاملے کو اس حد تک نہ لے جایا جائے کہ پارٹی کو انہیں برطرف کرنے کا فیصلہ کرنا پڑے۔

بتایا جاتا ہے کہ کونڈا سریکھا نے ہائی کمانڈ سے اپنے فیصلے پر نظرِ ثانی کی درخواست بھی کی، تاہم ان کی اپیل کا کوئی اثر نہیں ہوا اور قیادت اپنے فیصلے پر قائم رہی۔

دریں اثنا، سیاسی حلقوں میں یہ قیاس آرائیاں جاری ہیں کہ چیف منسٹر اے ریونت ریڈی کے دہلی سے حیدرآباد واپس پہنچنے تک کونڈا سریکھا استعفیٰ پیش کر سکتی ہیں۔ اطلاعات کے مطابق سریکھا نے مبینہ طور پر یہ فیصلہ کیا ہے کہ برطرف کیے جانے کے بجائے خود استعفیٰ دینا بہتر ہوگا۔

دوسری جانب وزارت سے استعفیٰ دینے کے بعد کانگریس میں برقرار رہنا بھی ان کے لیے باعثِ شرمندگی ہوسکتا ہے، جس کے پیش نظر کونڈا سریکھا کی جانب سے پارٹی سے بھی استعفیٰ دینے پر غور کیے جانے کی اطلاعات ہیں۔

کونڈا سریکھا کے مستقبل کے سیاسی فیصلے پر تلنگانہ کے سیاسی حلقوں کی نظریں مرکوز ہیں۔ اب سب کی توجہ اس بات پر ہے کہ آیا وہ وزارت سے استعفیٰ دیتی ہیں یا ہائی کمانڈ کے فیصلے کے بعد کوئی دوسرا سیاسی قدم اٹھاتی ہیں۔