تلنگانہ میں اقلیتی بہبود اسکیموں اور رمضان کے انتظامات کا اعلیٰ سطحی جائزہ، وزیر محمد اظہرالدین کی صدارت میں اہم ریویو میٹنگ

حیدرآباد: تلنگانہ حکومت کے محکمہ اقلیتی بہبود کی جانب سے ایک اہم اعلیٰ سطحی ریویو میٹنگ منعقد کی گئی، جس کی صدارت معزز وزیر برائے پبلک انٹرپرائزز و اقلیتی بہبود محمد اظہرالدین نے کی۔ یہ اجلاس سکریٹریٹ میں منعقد ہوا، جس میں ریاست بھر کے تمام ضلع مائنارٹیز ویلفیئر آفیسرز نے شرکت کی۔

اس میٹنگ میں رمضان المبارک کے انتظامات، شادی مبارک اسکیم، پردھان منتری جن وکاس کاریہ کرم کے تحت جاری ترقیاتی منصوبوں، کرسمس تقاریب کے کاموں اور مختلف اقلیتی فلاحی اسکیموں کی پیش رفت پر تفصیلی جائزہ لیا گیا۔

اجلاس میں حکومت کے مشیر محمد علی شبیر، تلنگانہ وقف بورڈ کے چیئرمین سید عظمت اللہ حسینی ، تلنگانہ مائنارٹیز ریزیڈینشل ایجوکیشنل انسٹی ٹیوشنز سوسائٹی کے چیئرمین فہیم قریشی، مائنارٹی فنانس کارپوریشن کے چیئرمین عبیداللہ کوتوال، مائنارٹی کمیشن کے چیئرمین طارق انصاری ، کرسچن فنانس کارپوریشن کے چیئرمین دیپک جان اور محکمہ اقلیتی بہبود کے اعلیٰ افسران بھی موجود تھے۔

تمام ضلع افسران نے رمضان المبارک کی تیاریوں، شادی مبارک اسکیم کے بجٹ کے استعمال اور جاری ترقیاتی منصوبوں کی صورتحال پر اپنی رپورٹس پیش کیں۔

وزیر محمد اظہرالدین نے افسران کو ہدایت دی کہ رمضان کے انتظامات کے لیے ضلعی سطح پر فوری اجلاس منعقد کیے جائیں، جن میں ضلع انچارج وزراء، ضلع کلکٹر، مقامی ایم ایل ایز، عوامی نمائندے اور مذہبی قائدین کو شامل کیا جائے۔

انہوں نے واضح کیا کہ شادی مبارک اسکیم کے تحت زیر التوا تمام درخواستوں کو جلد از جلد نمٹایا جائے اور تمام فلاحی اسکیموں کو مؤثر انداز میں نافذ کیا جائے تاکہ مستحق افراد کو بروقت فائدہ پہنچ سکے۔

وزیر موصوف نے یہ بھی ہدایت دی کہ پردھان منتری جن وکاس کاریہ کرم کے تحت جاری منصوبوں کو ترجیحی بنیاد پر مکمل کیا جائے اور کرسمس تقاریب کے لیے جاری کردہ بجٹ کو چرچوں کی مرمت، وائٹ واشنگ اور بجلی کے انتظامات کے لیے استعمال کیا جائے۔

تلنگانہ حکومت کا مقصد اقلیتی طبقات کی فلاح و بہبود کو مزید مضبوط بنانا اور تمام اسکیموں کو زمین پر مؤثر انداز میں نافذ کرنا ہے تاکہ عوام کو زیادہ سے زیادہ سہولت فراہم کی جا سکے۔