کاماریڈی میں ہولناک سڑک حادثہ، دو کاروں کے درمیان پھنسنے سے نویں جماعت کا طالب علم ہلاک

کاماریڈی: کاماریڈی کے قدیم نیشنل ہائی وے پر پیش آئے ایک ہولناک سڑک حادثے میں نویں جماعت کا ایک طالب علم جاں بحق جبکہ اس کا دوست شدید زخمی ہوگیا۔ حادثے کی خوفناک مناظر سی سی ٹی وی کیمرے میں قید ہوگئے۔

تفصیلات کے مطابق نویں جماعت میں زیر تعلیم دو قریبی دوست اسکوٹی پر سفر کر رہے تھے کہ اچانک ان کی اسکوٹی دو کاروں کے درمیان پھنس گئی۔ دونوں کاروں کی زد میں آنے سے اسکوٹی بری طرح کچلی گئی۔

حادثے میں ہیمنت نامی طالب علم شدید زخمی ہوکر موقع پر ہی دم توڑ گیا، جبکہ اس کا دوست لوکیش شدید زخمی ہوگیا۔ زخمی لوکیش کو فوری طور پر علاج کے لیے قریبی اسپتال منتقل کیا گیا، جہاں اس کا علاج جاری ہے۔

حادثے کا پورا واقعہ سڑک پر نصب سی سی ٹی وی کیمرے میں ریکارڈ ہوگیا، جس کی مدد سے پولیس حادثے کی وجوہات اور پورے واقعے کی ترتیب کا جائزہ لے رہی ہے۔

پولیس نے ایک کار کے ڈرائیور کی شناخت بھی کی ہے، جو مبینہ طور پر نابالغ لڑکا بتایا گیا ہے۔ پولیس کی جانب سے حادثے کی مزید تحقیقات جاری ہیں اور سی سی ٹی وی فوٹیج سمیت دیگر شواہد کا جائزہ لیا جا رہا ہے۔

اس المناک حادثے کے بعد علاقے میں غم کی لہر دوڑ گئی، جبکہ پولیس حادثے کی اصل وجوہات اور ذمہ داری کا تعین کرنے میں مصروف ہے۔