حیدرآباد: یوٹیوبر پر حملہ۔پولیس تحقیقات میں تیزی

حیدرآباد: شہرحیدرآباد کے راجندر نگر میں یوٹیوبر گریش پر ہوئے حملے کے کیس میں پولیس نے تحقیقات میں تیزی پیدا کردی ہے۔

یوٹیوبر پر حملہ روکنے کے لئے پہنچے پولیس ملازمین کے ساتھ بدسلوکی کرنے اور حملے میں ملوث افراد کے خلاف مختلف دفعات کے تحت مقدمہ درج کیا گیا ہے۔

پولیس نے مجموعی طور پر 45 افراد کے خلاف کیس درج کیا ہے، جن میں سے 5 افراد کو گرفتار کرکے ریمانڈ کردیاگیا۔ باقی 40 ملزمین کی تلاش جاری ہے۔

دوسری جانب یوٹیوبر گِریش نے الزام لگایا کہ اس پر اور اس کے دفتر پر منصوبہ بندطریقہ سے حملہ کیاگیا۔ راجندر نگر سرکل کے حیدر گوڑہ میں واقع ایک اپارٹمنٹ میں رہنے والے یوٹیوبر گریش پر یوٹیوب چینل چلا کر بلیک میلنگ کرنے کے الزامات عائد کئے گئے ہیں۔

جب بعض افراداس سے وضاحت طلب کرنے اس کے گھر پہنچے تو گریش نے ان پر مرچ پاؤڈر پھینک کر حملہ کردیا۔ اس کے بعد مشتعل افراد نے ا س کے گلے میں چپلوں کی مالا ڈال کر اسے گلیوں میں گھمایا۔