حیدرآباد: ٹیکس چوری کے شبہ میں تین رسٹورنٹس پر آئی ٹی کے چھاپے۔ 30 مقامات کی تلاشی
حکام نے بتایا کہ معمول کی فروخت کے علاوہ ان میں سے ایک آوٹ لیٹ آن لائن آرڈرس اور فرنچائز کے ذریعہ بھی نمایاں کاروبار کرتا ہے خاص طور پر حلیم کے سیزن کے دوران جب اس کی فروخت کئی کروڑ روپے تک پہنچ جاتی ہے۔
حیدرآباد: آئی ٹی کے تحقیقاتی ونگ، حیدرآباد یونٹ نے منگل کو شہر حیدرآبادکے تین مشہور ترین بریانی رسٹورنٹس چینس پر بڑے پیمانے پر ٹیکس چوری کے شبہ میں تلاشی لی۔ شبہ ہے کہ ان رسٹورنٹس نے کئی کروڑ روپے کی فروخت پر ٹیکس بچایا ہے۔
آئی ٹی کی ٹیموں نے ان سرکردہ رسٹورنٹس سے متعلق دفاتر اور ان کے عہدیداروں کی رہائش گاہوں پر چھاپے مارے۔
تلاشی کا عمل جملہ30مقامات پر کیاگیا۔
عہدیداروں کے مطابق، یہ کارروائیاں ان تینوں برانڈس سے جڑے کئی مقامات پر کی گئیں۔
حکام نے بتایا کہ معمول کی فروخت کے علاوہ ان میں سے ایک آوٹ لیٹ آن لائن آرڈرس اور فرنچائز کے ذریعہ بھی نمایاں کاروبار کرتا ہے خاص طور پر حلیم کے سیزن کے دوران جب اس کی فروخت کئی کروڑ روپے تک پہنچ جاتی ہے۔
اس برانڈ کی مقبولیت نے سالوں کے دوران سلمان خان جیسی مشہور شخصیات کو بھی اپنی طرف متوجہ کیا ہے۔
عہدیداروں نے اشارہ دیا کہ ایک اوررسٹورنٹ بڑے فوڈ۔ایگری گیٹر پلیٹ فارمس پر بھی ایک اہم مقام رکھتا ہے۔
تحقیقاتی ٹیموں نے ٹیکس چوری کی جانچ کے حصہ کے طور پر مالی ریکارڈس، برانچ کے حساب سے لین دین اور دیگر دستاویزات کا جائزہ لیا۔ حکام نے بتایا کہ مزید جانچ جاری ہے۔
