حیدرآباد: سڑک حادثہ میں ایک نوجوان ہلاک اور دو افراد زخمی

حیدرآباد: حیدرآباد کے مضافاتی علاقہ یاچارم پولیس اسٹیشن کے حدود میں پیش آئے ایک سڑک حادثہ میں ایک نوجوان ہلاک اور دو افراد زخمی ہو گئے۔

تفصیلات کے مطابق، جِلیلا گوڑہ کے رہنے والا 18 سالہ سریناتھ اپنے دو دوستوں راماینم منی دیپ اور شونتی چرن کے ساتھ موٹر سائیکل پر ویزاگ کالونی گیا تھا۔

واپسی کے دوران رات ہونے کی وجہ سے تینوں نے ونجامور گاؤں میں سریناتھ کے رشتہ داروں کے گھر رات گزاری۔ اتوار کی صبح وہ تینوں دوبارہ موٹر سائیکل پر گھر واپس روانہ ہوئے۔

جب وہ یاچارم منڈل میں واقع ایچ پی پٹرول پمپ کے قریب پہنچے تو موٹر سائیکل اچانک بے قابو ہو کر سڑک کے کنارے ایک درخت سے ٹکرا گئی۔

ٹکر اتنی شدید تھی کہ سریناتھ موقع پر ہی ہلاک ہو گیا۔زخمی ہونے والے دو نوجوانوں کو فوری طور پر سرکاری اسپتال منتقل کیا گیا۔ پولیس نے مقدمہ درج کر کے جانچ شروع کر دی ہے۔