حیدرآباد:صنعتی نمائش میں خواتین کو نامناسب طور پر چھونے والے کی ویڈیو پولیس نے بیوی کو دکھائی

حیدرآباد: شہرحیدرآبادکی کل ہند صنعتی نمائش میں آنے والی لڑکیوں اورخواتین سے چھیڑچھاڑکرنے والوں پرپولیس کی شی ٹیموں کی جانب سے نظررکھی جارہی ہے۔

عوام کے ہجوم کافائدہ اٹھاتے ہوئے لڑکیوں اورخواتین کو نشانہ بنانے والے افراد کے خلاف کارروائی کی جارہی ہے اور ان کی حرکت کے شواہد کے ساتھ ان کو پکڑا جارہا ہے۔

ایسے ہی ایک معاملہ میں گذشتہ روزایک شخص کو پکڑاگیا جس نے ہجوم کافائدہ اٹھاتے ہوئے خواتین کونامناسب طورپر چھواتھا۔

اس شخص کوپکڑکر پولیس اسٹیشن بیگم بازارمنتقل کردیاگیا۔ بعد ازاں اس کی بیوی کوپولیس اسٹیشن طلب کرتے ہوئے شوہرکی اس حرکت سے واقف کروایاگیا۔

پولیس نے اسے خفیہ طور پر ریکارڈ کی گئی وہ ویڈیو دکھائی جس میں وہ ہجوم میں خواتین کو چھو رہا تھا۔ اس ویڈیو کو دیکھنے کے بعد اس کی بیوی اس پر برہم ہوگئی۔ یہ واقعہ سوشل میڈیا پر وائرل ہوگیا۔