کار کا بونٹ کھولتے ہی اڑ گئے ہوش۔انجن میں زہریلا ناگ نکلا

حیدرآباد: آندھرا پردیش کے شہر وشاکھاپٹنم کے علاقہ کرمناپالم میں ایک ایسا واقعہ پیش آیا جس نے کار مالک اور مقامی افرادکے رونگٹے کھڑے کر دیئے۔اپنے کام سے باہر جانے کے لئے ایک شخص نے جیسے ہی اپنی کار کا بونٹ کھولا، اندر کا منظر دیکھ کر اس کی جان نکلتے نکلتے بچ گئی۔

کار کے انجن والے حصہ میں ایک بڑا اور زہریل ناگ کنڈلی مارے آرام سے بیٹھا تھا۔ بونٹ کھلتے ہی جیسے ہی روشنی اندر پڑی، ناگ نے اچانک اپنا پھن پھیلا لیا اور زوردار پھنکاریں مارنا شروع کر دیں۔ یہ دیکھ کر کار کا مالک خوف کے مارے پیچھے ہٹ گیا اور آس پاس کے لوگوں میں بھی کھلبلی مچ گئی۔

سانپ اس قدر برہم تھا کہ کوئی بھی کار کے قریب جانے کی ہمت نہیں کر پا رہا تھا۔ مقامی افرادنے فوری طور پر مشہور سانپ پکڑنے والے کرن کو اطلاع دی۔ اطلاع ملتے ہی کرن وہاں پہنچا اور انتہائی مہارت سے انجن کے پیچیدہ حصوں میں چھپے اس ناگ کو بحفاظت باہر نکال لیا۔

سانپ کے پکڑے جانے اور اسے دور جنگل میں چھوڑے جانے کے بعد کار مالک اور مقامی افرادنے اطمینان کا سانس لیا۔ اس واقعہ کی ویڈیو اب سوشل میڈیا پر تیزی سے وائرل ہو رہی ہے جسے دیکھ کر لوگ دنگ رہ گئے ہیں۔ ماہرین کا مشورہ ہے کہ گاڑی اسٹارٹ کرنے سے پہلے خاص طور پر بارش کے موسم میں ایک بار اچھی طرح معائنہ ضرور کر لیں۔