مثالی پڑوس، مثالی معاشرہ جماعت اسلامی ہند، راجندر نگر کا حقوق ہمسایہ ایکسپو
تقریب میں مرد، خواتین اور بچوں سمیت 400 سے زائد افراد نے شرکت کی۔ شرکاء نے تمام ماڈلز کا معائنہ کیا اور سماجی شعور بیدار کرنے والے مختلف تصورات سے فائدہ اٹھایا۔ پورا ماحول علمی، ہم آہنگ اور تربیتی روح سے معمور نظر آیا۔
حیدرآباد: جماعت اسلامی ہند، راجندر نگر کے زیرِ اہتمام "مثالی پڑوس، مثالی معاشرہ” کے عنوان سے حقوقِ ہمسایہ ایکسپو نہایت کامیابی کے ساتھ منعقد ہوا۔ اس پروگرام کا مقصد صحت مند سماجی رویوں کو فروغ دینا، پڑوسیوں کے حقوق کی اہمیت کو اجاگر کرنا اور ایک مثالی اور ہم آہنگ معاشرے کی تشکیل کے لیے بیداری پیدا کرنا تھا۔
ایکسپو میں شعبۂ خواتین، سی آئی او اور جی آئی او کی جانب سے 18 تخلیقی اور جامع ماڈلز پیش کیے گئے جن میں سماجی تعاون، ماحولیات کا تحفظ، تعلیم، صحت، کمیونٹی سپورٹ اور ذمہ دار شہری ہونے جیسے اہم موضوعات کو نہایت موثر انداز میں پیش کیا گیا۔ اس کے ساتھ چارٹس، پریزنٹیشنز، ویژول ماڈلز اور ایک پیغام آفریں اسکیٹ نے شرکاء کو بے حد متاثر کیا۔
تقریب میں مرد، خواتین اور بچوں سمیت 400 سے زائد افراد نے شرکت کی۔ شرکاء نے تمام ماڈلز کا معائنہ کیا اور سماجی شعور بیدار کرنے والے مختلف تصورات سے فائدہ اٹھایا۔ پورا ماحول علمی، ہم آہنگ اور تربیتی روح سے معمور نظر آیا۔
اس موقع پر امیرِ مقامی جماعت اسلامی ہند، راجندر نگر جناب وقار احمد نے تمام ذمہ داران، خصوصاً شعبۂ خواتین کی منظم تیاری، بہترین صلاحیت اور بھرپور محنت کی تعریف کرتے ہوئے کہا کہ یہ پروگرام ’مثالی پڑوس، مثالی معاشرہ‘ کے عملی تصور کی بہترین مثال ہے۔
انہوں نے امید ظاہر کی کہ اس نوعیت کے پروگرام معاشرے میں مثبت تبدیلی، ہم آہنگی اور سماجی بیداری کے فروغ کا ذریعہ ثابت ہوں گے۔ اختتام پر انہوں نے دعا کی کہ اللہ تعالیٰ تمام محنتوں کو قبول فرمائے اور حقوقِ ہمسایہ مہم کو دور رس اثرات عطا کرے۔
