حیدرآباد: پڑوسی ریاست کرناٹک میں ہوئی شکست کے بعد بی جے پی قیادت نے اب تلنگانہ پر توجہ مرکوزکردی ہے۔
پارٹی کے سرکردہ لیڈر و مرکزی وزیرداخلہ امیت شاہ اور پارٹی کے قومی صدر جے پی نڈا جاریہ سال کے اواخر میں اس تلگو ریاست میں ہونے والے انتخابات کے پیش نظر پارٹی کی حکمت عملی کی تیاری اور پارٹی کو مستحکم کرنے مختلف سرگرمیوں میں مصروف ہیں۔
ریاست سے تعلق رکھنے والے سینئر لیڈروں ای راجندر اور کومٹ ریڈی راج گوپال ریڈی کو پارٹی ہائی کمان نے قومی دارالحکومت آنے کی ہدایت دی ہے۔
ذرائع کے مطابق مرکزی وزیرسیاحت کشن ریڈی جو حیدرآباد میں تھے کو بھی دہلی آنے کی ہدایت دی گئی ہے۔
اس ہدایت کے ساتھ ہی حیدرآباد میں مختلف پروگراموں کو منسوخ کرتے ہوئے کشن ریڈی دہلی روانہ ہوگئے۔
سمجھاجاتا ہے کہ کشن ریڈی ای راجندراور راج گوپال ریڈی کے ساتھ منعقد ہونے والے اجلاس میں شرکت کریں گے۔
جیسے جیسے تلنگانہ میں انتخابات قریب آرہے ہیں،زعفرانی جماعت کی قیادت نے پارٹی میں ناراضگیوں کو دور کرنے کے سلسلہ میں اقدامات میں تیزی پیدا کردی ہے اور ناراض لیڈروں کو مطمئن کرنے کے مشن پر توجہ مرکوز کردی گئی ہے۔
بی جے پی کے قومی صدر جے پی نڈا اور مرکزی وزیر داخلہ امیت شاہ نے پارٹی کی صورتحال سے واقفیت حاصل کرنے کے بعد پارٹی کے ان لیڈروں کو دہلی طلب کیا ہے۔
ای راجندر ریاست کی پارٹی قیادت سے ناراض ہیں اسی لئے وہ پارٹی کی سرگرمیوں سے کچھ عرصہ سے دوری اختیار کئے ہوئے ہیں۔
