آندھراپردیش میں دو کاروں میں بھیانک تصادم،4افراد ہلاک

امراوتی: آندھرا پردیش کے ضلع انا میا میں پیش آئے سڑک حادثہ میں 4افراد ہلاک اور دیگر4زخمی ہوگئے۔ ضلع کے رام پورم منڈل میں چتور، کڑپہ نیشنل ہائی وے پر کتہ پلی کراس کے قریب دوکار یں سامنے سے آپس میں ٹکرا گئیں۔دوخواتین کے بشمول 4افراد ہلاک ہوگئے جبکہ مزید4 افراد زخمی ہوگئے۔

پولیس نے زخمیوں کو راجیو گاندھی انسٹیٹیوٹ آف میڈیکل سائنسس کڑپہ منتقل کردیا گیا۔ مہلوکین کی شناخت65 سالہ لکشماں، 60 سالہ چنا اکا، 41سالہ نرسیا اور 35سالہ راجہ ریڈی کارڈرائیور کے طور پر ہوئی ہے۔ بدویل کی رہنے والی لکشماں کو جو فالج کی مریضہ ہے۔

 اس کے افراد خاندان علاج کیلئے بذریعہ کار ضلع چتور کے ویرویکشا پورم لے جارہے تھے کہ ان کی کار جس میں یہ افراد سوار تھے، کتہ پلی کراس کے قریب مخالف سمت سے آنے والی ایک دوسری کار سے ٹکرا گئی۔

جس کے نتیجہ میں لکشماں اور اس کا بیٹا نرسیا اور کارڈرائیور راجہ ریڈی برسر موقع ہلاک ہوگئے۔ دیگر دو رشتہ دار چنا اکا اور ایک لڑکا ہریش وردھن شدید زخمی ہوگئے تاہم چنااکا نے ہاسپٹل میں دم توڑ دیا۔ دوسری کار میں سوار3افراد جو راے چوٹی سے کڑپہ جارہے تھے۔ زخمی ہوگئے ان زخمیوں کو بھی ریمس میں شریک کرایا گیا۔