سمندر میں تیرتے فائر اسٹیشن کا افتتاح
اس فائر فائٹنگ سنٹر کو سولار سسٹم سے توانائی فراہم کرنے کا خصوصی بندوبست کیا ہے جبکہ 4 طاقتور انجن اس اسٹیشن پر نصب ہیں جن کی وجہ سے انتہائی برق رفتاری سے جائے حادثہ تک پہنچا جا سکتا ہے۔
ابو ظہبی: دبئی میں پانی پر دنیا کے پہلے فائر اسٹیشن کا افتتاح عمل میں لایاگیا۔ یہ فائر فلوٹنگ اسٹیشن سمندری حادثات کی صورت میں فوری امداد فراہم کرے گا۔
دبئی جدت اور ترقی میں ایک بار پھر دنیا پر بازی لے گیا ہے اور وہاں دنیا کا پہلا سمندر میں تیرتا فائر اسٹیشن کا افتتاح عمل میں لایاگیا۔ جدید سہولتوں سے آراستہ یہ فائر اسٹیشن سمندری حادثات پر فوری کنٹرول کرنے کیلئے مدد فراہم کرے گا۔
رپورٹ کے مطابق یہ فائر فلوٹنگ اسٹیشن کم خرچ میں تیار کیاگیا ہے یعنی پرانے اور روایتی میرین فائر اسٹیشنوں کے مقابلہ میں 70 فیصد سے زیادہ اخراجات کی بچت کے ساتھ عمدہ کارکردگی پیش کرتا ہے۔
آبی فائر فائٹنگ اسٹیشن کی رفتار 11 میل فی گھنٹہ ہے جبکہ اس میں فائر فائٹنگ کے آلات سے لیس اسپیڈ بوٹس اور واٹر اسکوٹرز بھی موجود ہیں جن کے ذریعہ فوری امداد بھی فراہم کی جاسکتی ہے۔
اس فائر فائٹنگ سنٹر کو سولار سسٹم سے توانائی فراہم کرنے کا خصوصی بندوبست کیا ہے جبکہ 4 طاقتور انجن اس اسٹیشن پر نصب ہیں جن کی وجہ سے انتہائی برق رفتاری سے جائے حادثہ تک پہنچا جا سکتا ہے۔
شہری دفاع کے ڈائریکٹر جنرل راشد ثانی المطروشی کا کہنا ہے کہ یہ تیز ترین فائر اسٹیشن جائے حادثہ پر محض 4 منٹ کے اندر پہنچ جانے کی صلاحیت کا حامل ہے اور یہ پہلا سینٹر ہوگا جو ماحول دوست بھی ہے۔
