ہندوستان اور پاکستان ایک اور بڑی ٹکر کیلئے تیار! ہند۔ پاک کے درمیان دبئی میں ہوگا سنسنی خیز مقابلہ

دبئی: ہندوستان اور پاکستان کے درمیان کرکٹ کا جوش ایک بار پھر عروج پر ہے۔ سوریا کمار یادو کی قیادت میں ہندوستانی ٹیم ایک ہفتہ کے اندر دوسری مرتبہ پاکستان کے خلاف میدان میں اترنے جا رہی ہے اور اس دوران حالات میں کئی دلچسپ موڑ دیکھنے کو ملے ہیں۔

ہندوستانی کھلاڑیوں نے پاکستانی کھلاڑیوں سے ہاتھ ملانے سے انکار کر دیا تھا جس کے بعد تنازع کھڑا ہوا، مگر میدان کے اندر اور باہر پاکستان کی مشکلات کم نہیں ہوئیں۔ پچھلے میچ میں پاکستانی کپتان سلمان آغا نے ٹاس جیت کر بیٹنگ کا فیصلہ کیا تھا جبکہ صورتحال ہدف کا تعاقب کرنے کے لیے موزوں تھی، جس کا خمیازہ انہیں بھگتنا پڑا۔

دوسری جانب ہندوستان نے اپنا پچھلا میچ عمان کے خلاف کھیلا جس میں ٹیم نے صرف چار وکٹیں حاصل کیں لیکن اہم بات یہ ہے کہ ہندوستان نے اس میچ میں آٹھ بولروں کو آزمایا، جس سے صاف ظاہر ہے کہ سپر-4 مرحلے کے آغاز سے پہلے کئی حکمت عملیوں پر کام کیا جا رہا ہے۔ اس بار پاکستانی کھلاڑی اس بات پر بھی نظر رکھے ہوئے ہیں کہ عمان کے خلاف شُبھمن گل کس گیند پر آؤٹ ہوئے تھے۔

ٹی20 کرکٹ میں ہندوستان کا پلڑا پاکستان پر بھاری رہا ہے۔ دونوں ٹیموں کے درمیان اب تک 14 ٹی20 میچ کھیلے گئے جن میں ہندوستان نے 10 میں کامیابی حاصل کی ہے اور اس ٹورنامنٹ میں بھی ہندوستان نے پاکستان کو 7 وکٹ سے شکست دی ہے۔

دبئی کی پچ کے بارے میں کہا جا رہا ہے کہ یہاں اسپنرز کو زیادہ مدد ملتی ہے، خاص طور پر ابوظہبی کے مقابلے میں۔ امکان ظاہر کیا جا رہا ہے کہ اگر اکشر پٹیل فٹ ہو گئے تو بھارت تین اسپنرز کے ساتھ میدان میں اترے گا۔ ابتدا میں گیند بلے پر اچھی طرح آتا ہے مگر جیسے جیسے میچ آگے بڑھتا ہے، بلے بازوں کا اصل امتحان شروع ہوتا ہے۔

اہم کھلاڑیوں کی بات کی جائے تو اکشر پٹیل کی فٹنس زیر بحث ہے کیونکہ انہیں عمان کے خلاف میچ میں چوٹ آئی تھی۔ اگر وہ دستیاب نہ ہوئے تو بھارت کو متبادل کھلاڑی میدان میں اتارنا ہوگا۔ جسپریت بمراہ کا فارم بھی سوالیہ نشان بنا ہوا ہے کیونکہ وہ اب تک صرف تین وکٹیں لے سکے ہیں۔ پاکستانی ٹیم میں سب کی نظریں سائم ایوب پر ہیں جو ابھی تک رنز نہیں بنا پائے لیکن چھ وکٹ ضرور حاصل کر چکے ہیں۔

میچ کا براہ راست نشریہ سونی اسپورٹس نیٹ ورک پر دکھایا جائے گا جبکہ آن لائن دیکھنے کے لیے سونی لِو ایپ پر لائیو اسٹریمنگ دستیاب ہوگی۔ میچ رات 8 بجے شروع ہوگا اور ٹاس 7:30 پر ہوگا۔

بھارت کی ممکنہ الیون: ابھشیک شرما، شبھمن گل، سوریا کمار یادو (کپتان)، تلک ورما، شیوم دوبے، سنجو سیمسن (وکٹ کیپر)، ہاردک پانڈیا، جسپریت بمراہ، ورون چکرورتی، کلدیپ یادو، اکشر پٹیل/ارشدیپ سنگھ۔

پاکستان کی ممکنہ الیون: صاحبزادہ فرحان، سائم ایوب، فخر زمان، سلمان آغا (کپتان)، حسن نواز، خوشدل شاہ، محمد حارث (وکٹ کیپر)، محمد نواز، شاہین آفریدی، حارث رؤف، ابرار احمد۔