یوکرین جنگ ’ہند وستان‘ روس کی مالی مدد کررہا ہے: امریکہ

واشنگٹن: امریکہ نے ایک بار پھر روس۔ یوکرین جنگ میں ہندوستان کی جانب سے روس کو مالی امداد فراہم کرنے کا الزام عائد کیا ہے۔

غیر ملکی خبر رساں ایجنسی رائٹر کی رپورٹ کے مطابق یہ بات وائٹ ہاؤز کے ڈپٹی چیف آف اسٹاف اور صدر ٹرمپ کے اہم سیاسی مشیر اسٹیفن ملر نے امریکی نشریاتی ادارہ کو انٹرویو دیتے ہوئی کہی۔

ایک سوال کے جواب میں اسٹیفن ملر نے ہندوستان پر الزام عائد کرتے ہوئے کہا کہ وہ روس سے تیل خرید کر یوکرین کے خلاف جاری جنگ میں اسے مالی معاونت فراہم کر رہا ہے۔ فاکس نیوز کے پروگرام میں گفتگو کرتے ہوئے انہوں نے کہا کہ لوگ یہ حقیقت جان کر حیران رہ جائیں گے کہ روسی تیل کی خریداری میں ہندوستان عملی طور پر چین کے برابر ہے۔

امریکی صدر کے اہم سیاسی مشیر نے کہا کہ ٹرمپ کے ہندوستانی وزیراعظم نریندرمودی سے بہت اچھے تعلقات ہیں لیکن ہندوستان کا اس طرح روس سے تیل خرید کر اسے جنگ میں مالی امداد فراہم کرنا امریکہ کو ہرگز قابل قبول نہیں ہے۔

دوسری جانب اس بیان پر ہندوستانی سفارت خانے کی جانب سے تاحال کوئی رد عمل یا تبصرہ نہیں کیا ہے تاہم گزشتہ روز بھارتی سرکاری ذرائع نے رائٹر کو بتایا تھا کہ نئی دہلی روس سے تیل کی خریداری جاری رکھے گا، چاہے امریکہ کی جانب سے دھمکیاں ہی کیوں نہ دی جائیں۔