انریزر و ٹکٹس پر ریل ون ایپ کے ذریعہ تین فیصد ڈسکاونٹ، انڈین ریلویز کا اعلان

حیدرآباد : انڈین ریلوے نے ڈیجیٹل ادائیگیوں کو فروغ دینے اور مسافروں کی سہولت کے لئے ریل ون موبائل ایپلی کیشن کے ذریعے انریزرو اور پلیٹ فارم ٹکٹوں کی خریداری پر 3 فیصد رعایت دینے کا اعلان کیا ہے۔

 ساؤتھ سنٹرل ریلوے کی جانب سے پیر کو جاری کردہ ایک ریلیز کے مطابق یہ رعایت آر۔ویلٹ(R-Wallet)کے علاوہ تمام ڈیجیٹل ادائیگیوں پر دستیاب ہوگی اور اس کا اطلاق 14 جنوری سے 14 جولائی تک رہے گا۔

 انڈین ریلوے کی جانب سے حال ہی میں متعارف کردہ ریل ون ایپ ایک جامع پلیٹ فارم ہے جس میں ریزروڈ اور ان ریزرو ٹکٹ بکنگ، پلیٹ فارم ٹکٹ، ٹرین کی لائیو ٹریکنگ، شکایات کا ازالہ اور ای-کیٹرنگ جیسی سہولیات یکجا کی گئی ہیں۔

یہ ایپلیکیشن اینڈرائیڈ پلے اسٹور اور آئی او ایس ایپ اسٹور دونوں پر دستیاب ہے اور اس میں موجودہ یوٹی ایس ایپ کی تفصیلات بھی استعمال کی جا سکتی ہیں۔

ریل ون ایپ کے ذریعہ مسافر گھر بیٹھے آسانی سے سفر اور پلیٹ فارم ٹکٹ بک کر سکتے ہیں جس سے انہیں ریلوے اسٹیشنوں پر لمبی قطاروں میں کھڑے ہونے سے نجات ملے گی۔

ڈیجیٹل انڈیا مہم کے تحت اس ایپ میں یو پی آئی ایپس، پے ٹی ایم، فون پے، گوگل پے اور انٹرنیٹ بینکنگ جیسے کیش لیس ادائیگی کے کئی آپشن فراہم کئے گئے ہیں۔

وزارت ریلوے نے واضح کیا ہے کہ جہاں دیگر ڈیجیٹل ذرائع پر 3 فیصد رعایت دی جا رہی ہے، وہیں (آر-ویلٹ) کے ذریعہ ہونے والی لین دین پر پہلے سے موجود 3 فیصد کیش بیک کی سہولت حسب سابق برقرار رہے گی۔