بچوں کا 20 فٹ لمبے اژدھے کے ساتھ کھیل، ویڈیو دیکھ کر لوگ حیران

نئی دہلی: انڈونیشیا میں سوشل میڈیا پر ایک حیران کن ویڈیو تیزی سے وائرل ہورہی ہے، جس میں چند بچے تقریباً 20 فٹ لمبے ایک دیوہیکل اژدھے کے ساتھ کھیلتے ہوئے نظر آرہے ہیں۔ حیرت کی بات یہ ہے کہ بچے اس بڑے سانپ سے خوفزدہ ہونے کے بجائے اس کے جسم کو کھیلنے کے لیے سلائیڈ کی طرح استعمال کررہے ہیں۔

وائرل ویڈیو میں دیکھا جاسکتا ہے کہ بچے باری باری اژدھے کے جسم پر چڑھتے ہیں اور اس پر سے پھسلتے ہوئے نیچے آتے ہیں۔ اس دوران بچے ہنستے اور کھیلتے نظر آتے ہیں۔ وہاں کچھ بڑے افراد بھی موجود ہیں، جو بچوں کو روکنے یا سانپ کو دور کرنے کے بجائے اس عجیب و غریب منظر کو اپنے موبائل فون میں ریکارڈ کررہے ہیں۔

بتایا جارہا ہے کہ یہ ایک ریٹیکیولیٹڈ پائتھن (Reticulated Python) ہے، جس کی لمبائی تقریباً 20 فٹ یعنی 6 میٹر ہوسکتی ہے۔ یہ سانپ زہریلا نہیں ہوتا، لیکن اپنی طاقتور گرفت کے ذریعے بڑے شکار کو جکڑنے اور نگلنے کی صلاحیت رکھتا ہے۔

اس ویڈیو کو سوشل میڈیا پر تقریباً ایک لاکھ 60 ہزار افراد تک دیکھا گیا، جس کے بعد صارفین کی جانب سے مختلف تبصرے سامنے آئے۔

ایک صارف نے تبصرہ کرتے ہوئے لکھا کہ انڈونیشیا میں اس طرح کے سانپ عام ہیں اور ممکن ہے کہ ویڈیو میں نظر آنے والا سانپ کسی خاندان کا پالتو ہو۔

ایک دوسرے صارف نے کہا کہ یہ سانپ انسانی موجودگی کا عادی معلوم ہوتا ہے، اسی لیے ویڈیو میں وہ زیادہ جارحانہ رویہ اختیار نہیں کررہا۔

جبکہ ایک اور صارف نے مزاحیہ انداز میں لکھا کہ بچے آخرکار گھروں میں انٹرنیٹ استعمال کرنے کے بجائے باہر کھیلتے ہوئے نظر آرہے ہیں۔

تاہم، جنگلی حیات سے متعلق ماہرین ایسے عمل کو خطرناک قرار دیتے ہیں۔

سوشل میڈیا پر یہ ویڈیو جہاں لوگوں کے لیے حیرت اور تفریح کا سبب بنی ہوئی ہے، وہیں بچوں کی حفاظت کے حوالے سے بھی سوالات اٹھا رہی ہے۔