معصوم بچوں کے گھر گرادیئے گئے، ان کے خوابوں کو چکنا چور کردیا گیا، کے ٹی آر کا جذباتی ٹویٹ

حیدرآباد: موسی ندی کے کیچمنٹ علاقوں میں حکومت کی جانب سے مسماری کی کارروائیاں تیزی سے جاری ہیں، جہاں غریبوں کے گھروں پر بلڈوزر چلائے جا رہے ہیں۔ ریونت ریڈی حکومت نے ان غریب خاندانوں کے گھروں کو منہدم کردیا ہے، جنہوں نے بڑی مشکل سے اپنی زندگی کی جمع پونجی سے یہ مکانات بنائے تھے۔ افسوسناک مناظر میں دو ننھی بچیوں کو مٹی کے ڈھیر پر دوبارہ اپنے گھر بنانے کی کوشش کرتے ہوئے دیکھا گیا، جس نے ہر کسی کا دل دہلا دیا۔

بی آر ایس کے کارگزار صدر کے ٹی راما راؤ نے اس ویڈیو پر ردعمل کرتے ہوئے گہرے دکھ اور جذبات کا اظہار کیا۔ انہوں نے کہا کہ ریونت ریڈی حکومت نے ان غریبوں کے گھر منہدم کر دیے اور ان کے خواب چکنا چور کر دیے۔ کے ٹی آر اس وقت جذباتی ہوگئے جب انہوں نے تباہ شدہ گھروں کے کھنڈرات میں بچیوں کی بے بسی دیکھی۔

کے ٹی آر نے حکومت کو مخاطب کرتے ہوئے کہا، "اپنے وزراء کو بلائیں اور ان معصوم بچوں کو بتائیں کہ ان کے گھر کیوں گرائے جا رہے ہیں۔ آپ آکر انہیں یہ بھی بتائیں کہ ان کی زندگی کیسے بہتر ہو گی۔ کیا یہی جمہوریت ہے جس کا آپ نے دعویٰ کیا ہے؟”

کے ٹی آر نے کانگریس لیڈر راہول گاندھی کو بھی مخاطب کرتے ہوئے کہا کہ وہ آئیں اور اپنی حکومت کی انہدامی کارروائیوں کو تلنگانہ میں دیکھیں، جو عوام کے خوابوں کو بکھیر رہی ہیں۔