ایرانی فوج کا ہیلی کاپٹر مارکیٹ پر گر کر تباہ، 4 افراد جاں بحق
ایرانی فوج اور متعلقہ سول اداروں نے واقعے کی تحقیقات کا آغاز کر دیا ہے تاکہ حادثے کی اصل وجوہات معلوم کی جا سکیں
ایران : اصفہان میں ایرانی فوج کا ایک ہیلی کاپٹر حادثے کا شکار ہو کر پھلوں کی ایک مصروف مارکیٹ پر گر پڑا، جس کے نتیجے میں پائلٹ، معاون پائلٹ سمیت دو دکاندار جاں بحق ہو گئے۔
ایرانی میڈیا رپورٹس کے مطابق حادثہ اس وقت پیش آیا جب فوجی ہیلی کاپٹر معمول کی پرواز پر تھا۔ اچانک تکنیکی خرابی کے باعث ہیلی کاپٹر کا توازن بگڑ گیا اور وہ سیدھا مارکیٹ کے احاطے میں جا گرا، جس سے وہاں موجود دکانوں اور سامان کو بھی شدید نقصان پہنچا۔ حادثے کے فوراً بعد علاقے میں افراتفری مچ گئی اور امدادی کارروائیاں شروع کر دی گئیں۔
عینی شاہدین کے مطابق ہیلی کاپٹر گرنے سے قبل اس میں آگ بھڑکنے کی اطلاعات بھی موصول ہوئیں، تاہم حکام نے تاحال اس کی باضابطہ تصدیق نہیں کی۔ غیر ملکی میڈیا کا کہنا ہے کہ آگ لگنے کے باعث ہیلی کاپٹر پر قابو پانا ممکن نہ رہا۔
ایرانی فوج اور متعلقہ سول اداروں نے واقعے کی تحقیقات کا آغاز کر دیا ہے تاکہ حادثے کی اصل وجوہات معلوم کی جا سکیں۔ حکام کا کہنا ہے کہ ابتدائی شواہد کی روشنی میں تکنیکی خرابی کو خارج از امکان قرار نہیں دیا جا سکتا، تاہم حتمی رپورٹ تحقیقات مکمل ہونے کے بعد جاری کی جائے گی۔
حادثے کے بعد مارکیٹ کو عارضی طور پر بند کر دیا گیا جبکہ جاں بحق افراد کی لاشیں پوسٹ مارٹم کے لیے منتقل کر دی گئیں۔ مقامی انتظامیہ نے متاثرہ دکانداروں کے اہل خانہ سے تعزیت کا اظہار کرتے ہوئے ہر ممکن تعاون کی یقین دہانی کرائی ہے۔
