بنگلورو میں کانگریس کی ترنگا یاترا

بنگلورو: کرناٹک میں حکمراں کانگریس نے جمعہ کو ریاستی دارالحکومت میں ہندوستانی مسلح افواج کے ساتھ اظہار یکجہتی کے لیے ترنگا یاترا کا اہتمام کیا۔

یاترا سے خطاب کرتے ہوئے ریاست کے نائب وزیر اعلیٰ ڈی کے شیوکمار نے بحرانوں سے نمٹنے کے لیے سابق وزیر اعظم اندرا گاندھی کی قیادت پر زور دیا۔

کے آر سرکل سے شروع ہوکر چناسوامی کرکٹ اسٹیڈیم کے قریب منسک اسکوائر پر اختتام پذیر اس یاترا میں طلباء، ریٹائرڈ دفاعی اہلکاروں اور مختلف سیاسی پس منظر سے تعلق رکھنے والے رہنماؤں سمیت معاشرے کے ایک وسیع طبقے نے شرکت کی۔

اجتماع سے خطاب کرتے ہوئے مسٹر شیوکمار نے کہا، "ہم نے سماج کے تمام طبقوں کو مدعو کیا… ہم اپنی مسلح افواج کو سلام پیش کرنا چاہتے ہیں اور ان کے ساتھ یکجہتی کے طور پر کھڑے ہیں۔

مجھے خوشی ہے کہ تھوڑے وقت اندر تمام طبقوں کے لوگ بشمول ریٹائرڈ مسلح افواج، طلباء اور تمام سیاسی جماعتوں کے لوگ یہاں شرکت کر رہے ہیں، ہندوستان مضبوط ہے۔ جس طرح ہم نے اندرا گاندھی کی قیادت میں حالات کو سنبھالا، ویسا ہی اب ہوگا اور ہندوستان کی جیت ہو گی۔”

وزیر داخلہ ڈاکٹر جی پرمیشورا، جنہوں نے ریلی میں شرکت کی، کہا، "ہم یہ پیغام دینا چاہتے ہیں کہ ہم سب آپ (ہندوستانی مسلح افواج) کے ساتھ ہیں۔

آپ نے جو بھی کارروائی کی ہے اس کی تعریف کی جاتی ہے۔ یہ یاترا ریلی علامتی طور پر یہ کہنے کے لیے منعقد کی گئی ہے۔”

وزیر ایچ کے پاٹل نے کہا، "یہ ترنگا یاترا ہماری مسلح افواج کے لیے ہماری اخلاقی حمایت اور تعریف کا اظہار کرتی ہے۔ انہوں نے دنیا کو دکھایا ہے کہ ہندوستان کے پاس دنیا کی سب سے مضبوط اور ذہین فوج ہے۔ ہم پاکستان کے ساتھ تنازعہ بڑھانے کے حق میں نہیں ہیں، لیکن اگر پڑوسی ملک ایسا کرتا ہے تو ہم خاموش نہیں بیٹھیں گے۔”

تقریب حب الوطنی کے جذبے سے بھرپور تھی، جس میں شرکاء نے قومی پرچم لہرایا اور مسلح افواج کی تعریف میں نعرے لگائے۔