اسحاق ڈار پاکستان کے نائب وزیراعظم مقرر

اسلام آباد: حیرت انگیزپیشرفت میں پاکستان کے وزیرخارجہ اسحاق ڈار کو اتوار کے دن ملک کا نائب وزیراعظم مقررکیاگیا۔ 73 سالہ چارٹرڈ اکاؤنٹنٹ اور سینئر سیاستداں اسحاق ڈار کا تعلق وزیراعظم شہبازشریف کی پاکستان مسلم لیگ (نواز) سے ہے۔

کابینی ڈیویژن کے جاری کردہ اعلامیہ کے بموجب وزیراعظم شہبازشریف نے فی الفور اثر کے ساتھ تاحکم ثانی یہ تقررکیا ہے۔ اعلان ایسے وقت ہوا جب وزیراعظم شہبازشریف اور وزیرخارجہ اسحاق ڈار دونوں سعودی عرب گئے ہوئے ہیں جہاں وہ ورلڈاکنامک فورم کے اجلاس میں شرکت کررہے ہیں۔

 اسحاق ڈار سابق وزیراعظم نوازشریف کے قریبی سمجھے جاتے ہیں۔ دونوں میں خاندانی رشتے بھی ہیں۔ وہ پچھلی دو حکومتوں میں وزیرفینانس رہ چکے ہیں۔ انہیں پارٹی کے تمام معاشی مسائل کا جواب سمجھاجاتا ہے۔

 کہاجارہا تھا کہ اسحاق ڈار کو پاکستانی سینیٹ کا صدرنشین بنایاجائے گا لیکن گذشتہ ماہ وہ یہ بازی ہار گئے کیونکہ پاکستان مسلم لیگ نواز نے بلاول بھٹو کی پاکستان پیپلز پارٹی کے ساتھ معاملت کرلی۔