ورنگل میں سیرت النبی ﷺ جلسہ سے قبل جمعیت علمائے ہند کی پریس کانفرنس، ملی و سماجی خدمات پر روشنی

ورنگل: سیرت النبی ﷺ کے عظیم الشان جلسۂ عام سے قبل جمعیت علمائے ہند کے مرکزی سکریٹری مولانا مفتی معصوم ثاقب قاسمی نے ورنگل میں ایک پریس کانفرنس سے خطاب کیا۔ اس موقع پر انہوں نے جمعیت علمائے ہند کی طویل عرصے سے جاری ملی، سماجی اور فلاحی خدمات کے علاوہ مختلف منصوبوں اور ملک گیر سرگرمیوں پر تفصیلی روشنی ڈالی۔

میڈیا سے گفتگو کرتے ہوئے مولانا مفتی معصوم ثاقب قاسمی نے تلنگانہ کے موجودہ سماجی، تعلیمی اور ملی حالات پر اپنے خیالات کا اظہار کیا۔ انہوں نے مسلمانوں کے آئینی حقوق کے تحفظ، معاشرے میں امن و بھائی چارے کے فروغ اور باہمی اتحاد و یکجہتی کی ضرورت پر زور دیا۔

انہوں نے کہا کہ موجودہ حالات میں سماج کے تمام طبقات کے درمیان باہمی تعاون، رواداری اور اتحاد کو فروغ دینا وقت کی اہم ضرورت ہے۔ اس کے ساتھ ہی انہوں نے ملی و سماجی مسائل کے حل کے لیے منظم انداز میں کام کرنے کی ضرورت پر بھی زور دیا۔

پریس کانفرنس میں مولانا منور، مولانا مقیت اور صادق حسین کے علاوہ جمعیت کے دیگر مقامی ذمہ داران اور میڈیا نمائندوں کی بڑی تعداد موجود تھی۔

یہ پریس کانفرنس ورنگل میں منعقد ہونے والے سیرت النبی ﷺ کے جلسۂ عام کے سلسلے میں منعقد کی گئی، جس کے ذریعے جمعیت کی جانب سے اپنے ملی و سماجی پیغام کو عوام تک پہنچانے پر بھی توجہ مرکوز کی گئی۔