جوبلی ہلز ضمنی انتخاب ،ایچ وائی سی سلمان کی نامزدگی خارج کردی گئی

حیدرآباد: جوبلی ہلز اسمبلی حلقہ کے ضمنی انتخاب سے قبل سیاسی منظرنامہ گرماتا جا رہا ہے۔ اسی دوران، حیدرآباد یوتھ کانگریس (HYC) کے بانی سلمان خان نے الزام عائد کیا ہے کہ الیکشن کمیشن نے ان کی نامزدگی کو بغیر کسی جواز کے مسترد کر دیا ہے۔

سلمان خان نے سوشل میڈیا پلیٹ فارم "ایکس (X)” پر ایک ویڈیو پیغام شیئر کرتے ہوئے کہا کہ ریٹرننگ آفیسر نے حکمراں کانگریس حکومت کے دباؤ میں آکر فیصلہ لیا ہے۔
انہوں نے اپنے پیغام میں لکھا:

“آج 22 اکتوبر 2025 کو جوبلی ہلز بائی پول سے میرے چاروں نامزدگی فارم بغیر کسی وجہ کے مسترد کر دیے گئے۔ ریٹرننگ آفیسر حکومت کے دباؤ میں کام کر رہا ہے۔”

انتخابی ذرائع کے مطابق، سلمان خان نے اپنے حلف نامے میں جائیداد کی تفصیلات ظاہر کی ہیں جن کی کل مالیت صرف ₹5,18,101 (پانچ لاکھ اٹھارہ ہزار ایک سو ایک روپے) بتائی گئی ہے۔ ان کی اہلیہ کے اثاثوں میں بینک میں ₹1,618، نقد ₹20,000، اور تقریباً تین تولے سونا شامل ہے۔

یہ اثاثے ظاہر ہونے کے بعد سیاسی و سماجی حلقوں میں حیرت کا اظہار کیا جا رہا ہے، خاص طور پر اس تناظر میں کہ سلمان خان پر پہلے سے کراؤڈ فنڈنگ میں خرد برد، مالی بے ضابطگی اور عطیات کے غلط استعمال جیسے الزامات لگ چکے ہیں۔

ذرائع کے مطابق، بورہ بنڈہ پولیس نے بھی حال ہی میں ان کے خلاف سوشل میڈیا پر اشتعال انگیز مذہبی بیانات دینے کے الزام میں مقدمہ درج کیا تھا۔

سیاسی مبصرین کا کہنا ہے کہ سلمان خان کی نامزدگی مسترد ہونے سے جوبلی ہلز بائی پول میں ایک نیا سیاسی موڑ پیدا ہوگیا ہے، کیونکہ وہ نوجوان ووٹروں میں مقبول شخصیت سمجھے جاتے ہیں اور ان کی شمولیت انتخابی مقابلے کو دلچسپ بنا سکتی تھی۔

واضح رہے کہ جوبلی ہلز اسمبلی حلقہ کا ضمنی انتخاب 11 نومبر کو منعقد ہوگا، جبکہ گنتی 14 نومبر کو کی جائے گی۔ یہ نشست بی آر ایس کے سابق رکن جی ماگنٹی گوپی ناتھ کے جون میں دل کا دورہ پڑنے سے انتقال کے بعد خالی ہوئی تھی۔