کے سی آر بی آر ایس پارلیمانی پارٹی کے اجلاس کی صدارت کریں گے

حیدرآباد: وزیراعلی تلنگانہ و بی آرایس سربراہ کے چندرشیکھرراو جمعہ 15ستمبرکی دوپہرپرگتی بھون میں بی آرایس پارلیمانی پارٹی کے اجلاس کی صدارت کریں گے۔بی آرایس پارلیمانی پارٹی کے ارکان،18تا22ستمبر ہونے والے پارلیمنٹ کے خصوصی سیشن کیلئے پارٹی کی حکمت عملی پر تبادلہ خیال کریں گے۔

پارٹی کے صدر نے تمام ارکان پارلیمنٹ کو ہدایت دی ہے کہ وہ اس اجلاس میں شرکت کریں۔واضح رہے کہ بی آرایس کی رکن کونسل کویتا نے قبل ازیں 47سیاسی جماعتوں بشمول بی جے پی اورکانگریس پر زوردیا تھا کہ وہ متحد ہوکرپارلیمنٹ کے آنے والے خصوصی سیشن میں خواتین ریزرویشن بل کی منظوری کویقینی بنائیں۔

علحدہ علحدہ طورپرانہوں نے مختلف لیڈروں کو لکھے گئے مکتوب میں ان پر زوردیا تھا کہ وہ سیاسی اختلافات کو بالائے طاق رکھتے ہوئے اس بل کی منظوری کو ترجیح دیں۔